નર્મદા પાઇપલાઇનના મેન્ટેનન્સને પગલે ભાણવડમાં ત્રણ દિવસ પાણી વિતરણ બંધ

નગરપાલિકા દ્વારા આજથી નાગરિકોને પાણીનો સંગ્રહ કરવા અપીલ

ભાણવડ શહેરમાં આજથી ત્રણ દિવસ સુધી પીવાના પાણીની વ્યવસ્થા ખોરવાઈ જવાની શક્યતા સર્જાઈ છે. શહેરને પાણી પૂરું પાડતી મુખ્ય નર્મદા લાઇન પર તાકીદનું રિપેરિંગ અને મેન્ટેનન્સ કામ હાથ ધરવામાં આવ્યું હોવાથી તંત્ર દ્વારા આ મોટો નિર્ણય લેવામાં આવ્યો છે. આ ટેકનિકલ કામગીરીના ભાગરૂપે તા. ૧૯ થી ૨૧ સપ્ટેમ્બર, ૨૦૨૬ સુધી સમગ્ર શહેરમાં નળ વાટે અપાતો પાણી પુરવઠો સંપૂર્ણપણે બંધ રાખવામાં આવશે.

આ સંદર્ભે ભાણવડ નગરપાલિકા તંત્ર દ્વારા શહેરના તમામ રહેણાંક તથા વેપારી વિસ્તારો માટે એક સત્તાવાર જાહેર નોટિસ બહાર પાડવામાં આવી છે. પાલિકાના જણાવ્યા અનુસાર નર્મદા પાઇપલાઇનમાં ચાલતી સમારકામની કામગીરી ખૂબ મહત્વપૂર્ણ હોવાથી આ ત્રણ દિવસ દરમિયાન પાણી વિતરણ શક્ય બનશે નહીં. મેન્ટેનન્સનું કામ પૂર્ણ થયા બાદ અને નર્મદા લાઇનમાંથી પૂરતા પ્રેશર સાથે નિયમિત પાણી મળવાનું શરૂ થયા પછી જ શહેરમાં ફરીથી જળ વિતરણ શ‚ કરવામાં આવશે. કામગીરી પૂરી થયે નગરપાલિકા દ્વારા વિતરણના નવા સમયપત્રક અને આયોજન અંગે શહેરીજનોને અગાઉથી જાણ કરી દેવાશે.

પાણી વિતરણ ત્રણ દિવસ સુધી ઠપ્પ રહેવાનું હોવાથી સ્થાનિક રહીશોને રોજિંદા જીવનમાં મુશ્કેલી ન પડે તે માટે પાલિકા તંત્ર દ્વારા ખાસ તાકીદ કરવામાં આવી છે. નગરજનોને અગાઉથી જરૂરી માત્રામાં પીવાનું અને વપરાશનું પાણી સંગ્રહ કરી રાખવા તેમજ આ સમયગાળા દરમિયાન પાણીનો બગાડ અટકાવી અત્યંત કરકસરપૂર્વક ઉપયોગ કરવા તંત્ર દ્વારા અનુરોધ કરાયો છે.