રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા સૌરાષ્ટ્રના સૌથી મોટા એવા રાજકોટના બેડી માર્કેટ યાર્ડમાં આજે સવારે ઘઉંની સીઝનની સર્વાધિક ૨,૦૫,૦૦૦ મણ (૪૧ લાખ કિલો) ઘઉંની આવક થતા હવે ઉપલબ્ધ જથ્થાનો નિકાલ ન થાય ત્યાં સુધી આવક બંધ કરવા નિર્ણય કરાયો છે.

વિશેષમાં રાજકોટ માર્કેટ યાર્ડના ડિરેકટર દિલીપભાઇ પનારાએ જણાવ્યું હતું કે, આજે રાજકોટ માર્કેટ યાર્ડમાં સીઝનની સર્વાધિક આવક નોંધાઇ છે. કોરોનાકાળ બાદ લોકો ફરી ઘઉંની બારમાસી ખરીદી કરવા તરફ વળ્યા છે અને શહેરની બજાર ઉપરાંત સીધા યાર્ડ ખાતે આવીને પણ ખરીદી કરી રહ્યા છે જેના પગલે આવક જેટલી જ લેવાલી પણ રહે છે. દરમિયાન આજની હરાજીમાં પ્રતિ ૨૦ કિલોના ગુણવત્તા અનુસાર રૂ.૪૭૦થી ૬૫૦ના ભાવે સોદા પડ્યા હતા. આગામી તા.૨૬ માર્ચથી રાજકોટ માર્કેટ યાર્ડમાં માર્ચ એન્ડિંગની રજાઓ શરૂ થાય તે પૂર્વે ખેડૂતો ઘઉંનો નિકાલ કરવા ઉતાવળ બન્યા છે. રાજકોટ માર્કેટ યાર્ડમાં અન્ય યાર્ડ કરતા વધુ સારા ભાવ ઉપજતા હોય અન્ય જિલ્લાના ખેડૂતો પણ રાજકોટ માર્કેટ યાર્ડમાં ઘઉં સહિતની જણસીઓના વેંચાણ માટે આવવા લાગ્યા છે.

ખેતર-વાડીમાંથી ઘઉં ઉપાડી સીધા યાર્ડમાં
ઘઉંનું વાવેતર કરનાર ખેડૂતો ખેતર વડીમાંથી ઘઉં ઉપાડ્યા બાદ સીધા જ યાર્ડમાં ઠાલવી રહ્યા છે. મોટા ભાગના ખેડૂતો પાસે સંગ્રહ કરવાની પૂરતી વ્યવસ્થા નથી તો ખેડૂતોનો એક વિશાળ વર્ગ ઘઉં ઉપાડ્યા બાદ પોતાના ઘર પરિવાર માટેનો સ્ટોક અલગ રાખીને અન્ય જથ્થાનું તુરંત જ વેંચાણ કરવા યાર્ડમાં આવી પહોંચે છે.