કેન્દ્રીય આવાસ અને શહેરી બાબતોના મંત્રાલય દ્વારા દેશના રિયલ એસ્ટેટ ક્ષેત્ર અને મકાન ખરીદદારો માટે એક અત્યંત મહત્વપૂર્ણ નિર્ણય લેવામાં આવ્યો છે. પશ્ચિમ એશિયામાં સર્જાયેલી વણસતી પરિસ્થિતિ અને અસ્થિરતાના કારણે વૈશ્વિક સપ્લાય ચેઈન પર માળખાકીય વિપરીત અસરો પડી છે, જેનાથી બાંધકામ માટે જરૂરી સામગ્રીની ભારે અછત ઊભી થઈ છે. આ સ્થિતિને ધ્યાનમાં રાખીને કેન્દ્ર સરકારે દેશની તમામ રાજ્ય રેરા ઓથોરિટીઓને એડવાઈઝરી જારી કરીને રજિસ્ટર્ડ રિયલ એસ્ટેટ પ્રોજેક્ટ્સની પૂર્ણ કરવાની સમયમર્યાદામાં ચાર મહિનાનો વધારો આપવાની ભલામણ કરી છે.  

મંત્રાલયના હાઉસિંગ ડિવિઝન દ્વારા ૩૧ જુલાઈ ૨૦૨૬ના રોજ જારી કરવામાં આવેલા પરિપત્ર અનુસાર, રિયલ એસ્ટેટ ક્ષેત્રના વિવિધ હિતધારકો અને બિલ્ડરો તરફથી રજૂઆતો મળ્યા બાદ આ નિર્ણય લેવાયો છે. નોંધનીય છે કે, નાણા મંત્રાલયના વ્યય વિભાગ દ્વારા ૨૯ એપ્રિલ ૨૦૨૬ના રોજ જારી કરાયેલા ઓફિસ મેમોરેન્ડમમાં પશ્ચિમ એશિયાની પરિસ્થિતિને 'ફોર્સ મેજ્યુઅર' (અણધારી આફત)ના કલમ હેઠળ "યુદ્ધ" સમાન ગણવામાં આવી છે.  

રેરા એક્ટ, ૨૦૧૬ની કલમ ૬ મુજબ, 'યુદ્ધ' અથવા તો કુદરતી આપત્તિ જેવા ફોર્સ મેજ્યુઅર સંજોગોમાં પ્રોજેક્ટના રજીસ્ટ્રેશનની મુદત લંબાવવાની સ્પષ્ટ જોગવાઈ છે. આ ઉપરાંત કલમ ૭(૩) હેઠળ, ઓથોરિટી ખરીદદારોના હિતોનું રક્ષણ કરીને રજીસ્ટ્રેશન રદ કરવાને બદલે યોગ્ય શરતો સાથે તેને ચાલુ રાખવાની મંજૂરી આપી શકે છે.  

કેન્દ્રીય મંત્રાલયની સલાહ મુજબ, જે રિયલ એસ્ટેટ પ્રોજેક્ટ્સની મૂળ પૂર્ણ થવાની તારીખ, સુધારેલી તારીખ અથવા અગાઉ લંબાવવામાં આવેલી મુદત ૨૮ ફેબ્રુઆરી ૨૦૨૬ અથવા તો તેના પછી આવતી હોય, તેવા તમામ રેરા-નોંધાયેલા પ્રોજેક્ટ્સને આ ચાર મહિનાના વધારાનો લાભ મળી શકશે.  

વૈશ્વિક સ્તરે બાંધકામ સામગ્રીના પુરવઠામાં વિલંબ થવાથી જે પ્રોજેક્ટ્સ અટકી પડ્યા હતા, તેમને પૂર્ણ કરવા માટે આ વધારાનો સમય અત્યંત રાહતરૂપ સાબિત થશે અને બિલ્ડરો પરથી બિનજરૂરી દંડ કે કાનૂની કાર્યવાહીનો બોજ હળવો થશે.  

બિલ્ડરો અને ડેવલપર્સને દરેક પ્રોજેક્ટ માટે અલગ-અલગ અરજીઓ કરવાના ઝંઝટમાંથી મુક્તિ આપવા માટે પણ વિશેષ વ્યવસ્થા કરવામાં આવી છે. મંત્રાલયે તમામ રાજ્ય રેરા ઓથોરિટીના ચેરપર્સન્સને વિનંતી કરી છે કે તેઓ પોતપોતાના રાજ્યમાં અલગ-અલગ અરજીઓ મંગાવવાને બદલે એક સામાન્ય/સામૂહિક આદેશ જારી કરે, જેથી સમયનો બગાડ અટકે અને વહીવટી પ્રક્રિયા ઝડપી બને.  

કેન્દ્રીય આવાસ અને શહેરી બાબતોના મંત્રીની મંજૂરી બાદ અંડર સેક્રેટરી સંજય કુમાર દ્વારા જારી કરાયેલી આ એડવાઈઝરીથી રિયલ એસ્ટેટ ઉદ્યોગમાં ચોક્કસપણે રાહતનો માહોલ સર્જાયો છે.