જામજોધપુર પંથકમાં ગેરકાયદે ખનીજ વહન કરતા ૪ ડમ્પર ઝડપાયા

બ્લેકટ્રેપ સહિત ૧ કરોડનો મુદ્દામાલ જપ્ત કરતી ખાણખનીજ

જામજોધપુર તાલુકાના શેઠવડાળા-સડોદર રોડ પર ખાણ-ખનીજ વિભાગની ટીમે ચેકિંગ દરમિયાન ગેરકાયદે ખનીજ વહન કરતા ચાર ડમ્પર ઝડપી પાડ્યા હતા. ચારેય ડમ્પર અને તેમાં ભરેલા ખનીજ સહિત અંદાજે ૧ કરોડનો મુદ્દામાલ જપ્ત કરવામાં આવ્યો હતો.
​​​​​​​
ચેકિંગ દરમિયાન પકડાયેલા ચાર ડમ્પરમાંથી બે ડમ્પર પરવાનગી વિના બ્લેકટ્રેપ ખનીજનું વહન કરતા હોવાનું સામે આવ્યું હતું, જ્યારે અન્ય બે ડમ્પરમાં ઓવરલોડ ખનીજ ભરેલું મળી આવ્યું હતું. નિયમોના ભંગ બદલ ખાણ-ખનીજ વિભાગે ચારેય ડમ્પર તથા ખનીજનો જથ્થો જપ્ત કરી આગળની કાર્યવાહી હાથ ધરી છે.
​​​​​​​
જપ્ત કરાયેલા ડમ્પરોને સુરક્ષા માટે ક્રિષ્ના સ્ટોન ક્રશર અને સ્વાતી સ્ટોન ક્રશર ખાતે સોંપવામાં આવ્યા છે. ખાણ-ખનીજ વિભાગની આ કાર્યવાહીમાં નૈતિકભાઈ, આનંદભાઈ અને નિખીલભાઈ જોડાયા હતા. વિભાગ દ્વારા નિયમભંગ બદલ આગળની કાયદેસરની કાર્યવાહી હાથ ધરવામાં આવી રહી છે.