હાલારમાં ૧૨૫ વીજજોડાણમાં અધધધ..રૂ.૧.૫૦ કરોડની ગેરરીતિ

દરોડા: જામનગર અને દેવભૂમિ દ્વારકા જિલ્લામાં વીજકંપનીની ૫૧ ટુકડીએ ૭૦૦ જોડાણ ચેક કર્યા 

રૂ.૧૦ અને ૫ લાખની પાવરચોરીના પર્દાફાશથી વીજતંત્રના અધિકારીઓ પણ ચોંકી ઉઠયા

હાલારમાં ૧૨૫ વીજજોડાણમાં અધધ..રૂ.૧.૫૦ કરોડની ગેરરીતિ ખૂલી છે. જામનગર અને દેવભૂમિ દ્વારકા જિલ્લામાં વીજકંપનીની ૫૧ ટુકડીએ ૭૦૦ જોડાણ ચેક કર્યા હતાં. મેગા ચેકીંગ ડ્રાઇવ દરમ્યાન રૂ.૧૦ અને ૫ લાખની પાવરચોરીનો પર્દાફાશ થતાં વીજતંત્રના અધિકારીઓ પણ ચોંકી ઉઠયા હતાં. 

જામનગર છેલ્લાં ઘણાં વર્ષોથી ટી એન્ડ ડી લોસમાં સૌરાષ્ટ્રમાં અવ્વલ હોય વીજકંપની દ્વારા છાશવારે વીજચેકીંગ કરવામાં આવે છે. જે અંતર્ગત જામનગર પીજીવીસીએલ વર્તુળ કચેરી દ્વારા જામનગર અને દેવભૂમિ દ્વારકા જિલ્લામાં વીજચોરી  ડામવા ગઇકાલે વીજકંપનીની ૫૧ ટીમોએ ચુસ્ત બંદોબસ્ત સાથે જામનગર શહેર અને ગ્રામ્ય તથા ખંભાળિયા સબ ડિવિઝન હેઠળના ગ્રામ્ય વિસ્તારોમાં દરોડા પાડયા હતાં. આ દરમ્યાન વીજજોડાણો અને વીજવપરાશની તપાસ કરવામાં આવી હતી. મોડી સાંજ સુધી ચાલેલી આ કામગીરી અંતર્ગત કુલ ૭૦૦ વીજ જોડાણ ચેક કરવામાં આવ્યા હતાં. જેમાંથી ૧૨૫ વીજકનેકશનમાંથી અધધ..રૂ.૧.૫૦ કરોડની વીજચોરી ઝડપાઇ હતી. વીજચેકીંગ દરમ્યાન કોઇ અનિચ્છનીય બનાવ ન બને તે માટે ચુસ્ત પોલીસ બંદોબસ્તની સાથે ચેકીંગ કામગીરીની વીડીયોગ્રાફી કરવામાં આવી હતી. સોમવાર અને મંગળવારે શહેરના સ્લમ વિસ્તારો ઉપરાંત જામનગર ગ્રામ્ય, લાલપુર અને ધ્રોલ પંથકમાં સઘન વીજચેકિંગ કરવામાં આવ્યું હતું. આ દરમિયાન કુલ ૧૪૩ થી વધુ સ્થળોએ વીજચોરી ખૂલી હતી અને તમામ આસામી સામે પોલીસ ફરિયાદો નોંધાવવામાં આવી છે. નોંધાયેલી ફરિયાદો પૈકી ૬૦ કીસ્સામાં રૂ.૧ લાખથી વધુની વીજચોરી ખૂલી હોવાનું જાણવા મળ્યું છે. બુધવારે જામનગર શહેર, ગ્રામ્ય તેમજ ખંભાળિયા સબ ડિવિઝન હેઠળના વિવિધ વિસ્તારોમાં વીજચેકિંગની કાર્યવાહી કરવામાં આવી હતી. શહેરના  નાગનાથ ગેઇટ, નદીપા રોડ, અંબાજી ચોક સહીતના વિસ્તારોમાં વીજટુકડીઓ ચુસ્ત પોલીસ બંદોબસ્ત સાથે ત્રાટકી હતી. ચેકીંગ દરમ્યાન રૂ.૧૦ અને ૫ લાખની વીજચોરીના કેસ નોંધાતા અધિકારીઓ પણ ચોંકી ઉઠયા હતાં.અત્રે નોંધનીય છે કે, વીજકંપની દ્વારા શહેર-જિલ્લામાં છાશવારે વીજચેકીંગની કામગીરી હાથ ધરવામાં આવે છે. આટલું જ નહીં ચેકીંગ દરમ્યાન કરોડોની વીજચોરી પણ પકડાઇ છે. આમ છતાં વીજચોરીનું દૂષણ યથાવત રહેતા ચેકીંગ કામગીરી અને ત્યારબાદ થતી વસૂલાત સામે અનેક સવાલો ઉઠયા છે.