અરજદારોએ આગામી તા.૧૩ ઓક્ટોબર સુધીમાં જિલ્લા પંચાયત જામનગર ખાતે રૂબરૂ અથવા પોસ્ટથી અરજી મોકલવાની રહેશે

​જિલ્લા પંચાયત, જામનગર તથા દેવભૂમિ દ્વારકાની કચેરીઓ વિરુદ્ધ લેબર કોર્ટ, ટ્રીબ્યુનલ, નામદાર હાઈકોર્ટ અને નામદાર સુપ્રિમ કોર્ટમાં ચાલતા કોર્ટ કેસોનું યોગ્ય મોનીટરીંગ કરવા, જરૂરી એફીડેવિટ કરવા, પુરાવા રજૂ કરવા, રીજોઈન્ડર કરવા અને કેસ/ચુકાદાના અમલીકરણ સંબંધે સરકારી વકીલ અને બંને જિલ્લા પંચાયત કચેરીઓ સાથે સંકલનની કામગીરી માટે, બંને કચેરી સારૂ સંયુક્ત રીતે કાયદા અધિકારીની ૧૧ માસના કરાર આધારિત (ફીક્સ પે)ની એક (૦૧) જગ્યા ભરવા અરજીઓ મંગાવાઈ છે.

આ જગ્યા માટે માસિક રૂ.૬૦,૦૦૦/- ફીક્સ પે વેતન ૧૧ માસ મુદ્દતના કરારીય સમયગાળા માટે ચુકવવામાં આવશે.​ઉમેદવારોએ કોરા નિયત અરજી ફોર્મ નાયબ જિલ્લા વિકાસ અધિકારીની કચેરી, મહેકમ શાખા, જિલ્લા પંચાયત, જામનગરમાંથી (રજાના દિવસો સિવાય, કચેરી સમય દરમ્યાન) મેળવીને, સૂચવેલ આધારો સાથેની ભરેલી અરજી તા.૧૩/૧૦/૨૦૨૫ના ૧૮:૧૦ કલાક સુધીમાં કચેરીમાં રૂબરૂ/પોસ્ટથી મળી જાય તે રીતે મોકલી આપવાની રહેશે.

નિમણૂક મેળવનાર ઉમેદવારની ફરજો, બોલીઓ-શરતો નિયત અરજી ફોર્મ સાથે આપવામાં આવશે, જે અરજી કરનારને બંધનકર્તા રહેશે. આ અંગે સરકારના વખતો-વખતના હુકમોનું પાલન કરવાનું રહેશે. અધૂરી વિગતની કે સંદિગ્ધ અરજીઓ તેમજ મુદત વિત્યા બાદ મળેલ અરજીઓ વિચારણામાં લેવામાં આવશે નહીં. ઉમેદવારને પસંદગી સમિતી દ્વારા રૂબરૂ બોલાવવામાં આવે ત્યારે તેમણે સ્વ-ખર્ચે આવવાનું રહેશે.તેમ જિલ્લા વિકાસ અધિકારીશ્રી, જામનગરની યાદીમાં જણાવાયું છે.