ભરૂચ જિલ્લાના દહેજ ઔદ્યોગિક વસાહતમાં આવેલી શ્વેતા કેમિકલ કંપનીમાં આજે ભીષણ આગ ફાટી નીકળતાં સમગ્ર વિસ્તારમાં અફરાતફરી મચી ગઈ હતી. આગ એટલી વિકરાળ હતી કે તેને "ફાયર બ્રિગેડનો મેજર કોલ" જાહેર કરવો પડ્યો હતો અને દૂર-દૂર સુધી ધુમાડાના ગોટેગોટા આકાશમાં છવાયેલા જોવા મળ્યા હતા.

પ્રાથમિક માહિતી અનુસાર, આગ લાગવાનું કારણ હજુ સ્પષ્ટ થયું નથી, પરંતુ કંપનીમાં રહેલા રસાયણોના કારણે આગે થોડી જ વારમાં વિકરાળ સ્વરૂપ ધારણ કરી લીધું હતું. આગની જાણ થતા જ દહેજ અને આસપાસના વિસ્તારોમાંથી ફાયર બ્રિગેડની અનેક ગાડીઓ ઘટના સ્થળે પહોંચી ગઈ હતી. ફાયર ફાઇટરો દ્વારા આગને કાબૂમાં લેવા માટે યુદ્ધના ધોરણે કામગીરી શરૂ કરવામાં આવી હતી.

​​​​​​​આ ઔદ્યોગિક વસાહત હોવાથી, આસપાસની અન્ય કંપનીઓમાં પણ સાવચેતીના ભાગરૂપે એલર્ટ જાહેર કરવામાં આવ્યું હતું. ધુમાડાના કારણે આસપાસના વિસ્તારોમાં વાયુ પ્રદૂષણની આશંકા પણ સેવાઈ રહી છે, જેના પગલે સ્થાનિક તંત્ર દ્વારા જરૂરી સૂચનાઓ જારી કરવામાં આવી છે.

આગને કારણે થયેલા નુકસાન અંગેનો અંદાજ આગ સંપૂર્ણપણે કાબૂમાં આવ્યા બાદ જ લગાવી શકાશે. સદનસીબે, તાત્કાલિક કાર્યવાહીના કારણે કોઈ મોટી જાનહાનિના અહેવાલ નથી, પરંતુ આગને કારણે મોટા પ્રમાણમાં માલસામાન અને મિલકતને નુકસાન થયું હોવાનું અનુમાન છે.