પાટણ જિલ્લામાં આજે એક અત્યંત દુઃખદ ઘટના બની છે, જ્યાં કપડાં ધોવા પરિવાર સાથે તળાવે ગયેલી બે માસૂમ બાળકીઓ પાણીમાં ડૂબી જતાં તેમનું કરુણ મોત નીપજ્યું છે. આ ઘટના લોલાડા ગામના તળાવ પર બની હતી.

​​​​​​​મળતી માહિતી અનુસાર, મંગળવારે બપોરે નાયક પરિવારના સભ્યો કપડાં ધોવા માટે લોલાડા ગામના તળાવ પર ગયા હતા. પરિવારની મહિલાઓ તળાવના કિનારે કપડાં ધોઈ રહી હતી, ત્યારે તેમની બે દીકરીઓ, શિલ્પા અને જયશ્રી, ગરમીથી રાહત મેળવવા માટે તળાવમાં ન્હાવા પડી હતી. ન્હાતી વખતે બંને બાળકીઓ તળાવના ઊંડા ભાગમાં પહોંચી ગઈ હતી અને પાણીમાં ગરકાવ થઈ ગઈ હતી.

પરિવારની મહિલાઓએ આ ઘટના જોતા જ બુમાબુમ કરી હતી, જેના પગલે આસપાસના લોકો તાત્કાલિક તળાવ પર દોડી આવ્યા હતા. સ્થાનિક તરવૈયાઓએ તાત્કાલિક બચાવ કામગીરી હાથ ધરી હતી અને તળાવમાં ડૂબેલી બંને માસૂમ બાળકીઓના મૃતદેહોને બહાર કાઢ્યા હતા. આ હૃદયદ્રાવક ઘટનાથી સમગ્ર લોલાડા ગામમાં શોકનો માહોલ છવાઈ ગયો છે.