ગુજરાત રાજ્યમાં અપૂરતા વરસાદના કારણે વીજળીનો શિસ્તબદ્ધ અને કરકસરપૂર્વક ઉપયોગ કરવા પ્રયાસો ચાલી રહ્યા છે ત્યારે અમદાવાદ મહાનગરપાલિકાને પગલે હવે રાજકોટ મહાનગરપાલિકા તંત્ર પણ આ વર્ષે દિવાળી કાર્નિવલ રદ કરવાની દિશામાં વિચારણા કરી રહ્યું હોવાનું જાણવા મળે છે.

રાજકોટના રેસકોર્સ રિંગ રોડ પર દર વર્ષે યોજાતા ચાર દિવસના ભવ્ય દિવાળી કાર્નિવલમાં દોઢથી બે કરોડ રૂપિયા જેટલો ખર્ચ થતો હોય છે. ઉપરાંત રોશની અને અન્ય વ્યવસ્થાઓમાં મોટા પ્રમાણમાં વીજળીનો વપરાશ થતો હોવાથી વર્તમાન પરિસ્થિતિમાં આવા ભપકાદાર આયોજનને બદલે સાદાઈથી દિવાળીની ઉજવણી કરવાનો વિકલ્પ વિચારાઈ રહ્યો છે.

રાજકોટ મહાનગરપાલિકા દ્વારા દર વર્ષે દિવાળીના તહેવારો દરમિયાન રેસકોર્સ રિંગ રોડ પર ચાર દિવસ સુધી રંગારંગ કાર્યક્રમો, રોશની અને મનોરંજનના વિવિધ આયોજનો સાથે દિવાળી કાર્નિવલ યોજવામાં આવે છે. આ આયોજન પાછળ મહાપાલિકાને અંદાજે દોઢથી બે કરોડ રૂપિયાનો ખર્ચ થાય છે. સમગ્ર રિંગ રોડને ઝળહળતી રોશનીથી શણગારવામાં આવતો હોવાથી વીજળીનો પણ મોટા પાયે ઉપયોગ થાય છે. જોકે આ વર્ષે રાજ્યમાં અપૂરતા વરસાદને પગલે વીજળીની કરકસર કરવાની જરૂરિયાત ઊભી થતાં આ પ્રકારના ખર્ચાળ આયોજનની આવશ્યકતા અંગે શાસકોએ પુનર્વિચાર શરૂ કર્યો હોવાનું જાણવા મળે છે.

અમદાવાદ મહાનગરપાલિકા દ્વારા દિવાળી કાર્નિવલ અંગે લેવાયેલા નિર્ણય બાદ રાજકોટ મહાનગરપાલિકાના શાસકો પણ એ દિશામાં આગળ વધે તેવી શક્યતા પ્રબળ બની છે. જોકે દિવાળીના તહેવારની ઉજવણી સંપૂર્ણપણે બંધ કરવાને બદલે શહેરવાસીઓ માટે એકાદ-બે સાંસ્કૃતિક કે અન્ય કાર્યક્રમોનું મર્યાદિત આયોજન કરવામાં આવે તેવો વિચાર પણ ચાલી રહ્યો છે. આવા કાર્યક્રમોમાં બિનજરૂરી ખર્ચ અને રોશનીનો ભપકો ટાળીને સાદગી જાળવવા પર ભાર મૂકવામાં આવે તેવી સંભાવના છે. હાલ રાજકોટના મેયર ડો.નેહલ શુક્લ નેશનલ અર્બન કોંક્લેવમાં ભાગ લેવા ભુવનેશ્વર ગયા હોવાથી તેમના પરત ફર્યા બાદ મંગળવારે આ મુદ્દે અંતિમ ચર્ચા કરવામાં આવે તેવી શક્યતા છે. આગામી મંગળવારે મહાપાલિકાના શાસકો દ્વારા દિવાળી કાર્નિવલ અંગે આખરી નિર્ણય લઈને તેની સત્તાવાર જાહેરાત કરવામાં આવે તેવા નિર્દેશ મળી રહ્યા છે.