અમેરિકામાં પાકિસ્તાનના રાજદૂત રિઝવાન સઈદ શેખે યુએસ રાષ્ટ્રપતિ ડોનાલ્ડ ટ્રમ્પને અપીલ કરી છે કે તેઓ ભારત અને પાકિસ્તાન વચ્ચે કાશ્મીરને લઈને વધી રહેલા તણાવને ઓછો કરવા માટે હસ્તક્ષેપ કરે. તેમણે કહ્યું કે કાશ્મીર વિશ્વનો સૌથી સંવેદનશીલ ન્યુક્લિયર ફ્લેશ પોઈન્ટ બની ચૂક્યો છે જ્યાં ભારત, પાકિસ્તાન અને ચીન ત્રણેય ન્યુક્લિયર તાકાતો સામેલ છે.

ભારત અને પાકિસ્તાન વચ્ચે તણાવની વધતી જતી આગને લઈને પાકિસ્તાનના અમેરિકામાં રાજદૂત રિઝવાન સઈદ શેખે રાષ્ટ્રપતિ ડોનાલ્ડ ટ્રમ્પને અપીલ કરી છે કે તેઓ ભારત-પાકિસ્તાન વચ્ચે વધી રહેલા તણાવને ઓછો કરવામાં મદદ કરે. તેમનું કહેવું છે કે જેમ રાષ્ટ્રપતિ ટ્રમ્પ યુરોપ અને મિડલ ઈસ્ટમાં સંઘર્ષો ઉકેલવાનો પ્રયાસ કરી રહ્યા છે, તેવી જ રીતે તેમણે દક્ષિણ એશિયામાં પણ શાંતિની પુનઃસ્થાપના માટે પગલાં ભરવા જોઈએ.

અમેરિકી મેગેઝિન ન્યૂઝવીકને આપેલા એક ઈન્ટરવ્યુમાં રિઝવાન સઈદે કહ્યું, "જો અમારી પાસે એવા રાષ્ટ્રપતિ હોય, જે આ શાસનકાળમાં વિશ્વમાં શાંતિ માટે ઊભા હોય, યુદ્ધને ખતમ કરવા, ટકરાવને રોકવા અને મુદ્દાઓને ઉકેલવાનો ઈરાદો ધરાવતા હોય, તો કાશ્મીરથી વધુ મહત્વપૂર્ણ અને ખતરનાક (ખાસ કરીને ન્યુક્લિયરની દૃષ્ટિએ) કોઈ બીજો ફ્લેશ પોઈન્ટ હોઈ ન શકે."