જામનગરમાં આઇએલઆર કચેરીના વર્ગ-૩ના કર્મીઓ સામૂહીક રજા પર, કામગીરી ઠપ્પ 

વિરોધ:પડતર ગ્રેડ-પેની માંગણી ન સંતોષાતા કર્મચારીઓનું ઉગ્ર બનતું આંદોલન, સોમવારથી અચોકકસ મુદતની હડતાળની ચિમકી

શહેર-જિલ્લાની કચેરીમાં જમીન માપણી, પ્રોપર્ટી કાર્ડ, રી-સર્વે સહીતની મહત્વની કામગીરી ખોરંભે ચડતા અરજદારોમાં ભારે દેકારો

જામનગરમાં આઇએલઆર કચેરીના વર્ગ-૩ના કર્મચારીઓ શનિવારે માસ સીએલ એટલે કે સામૂહીક રજા પર જતાં કામગીરી ઠપ્પ થઇ ગઇ હતી. પડતર ગ્રેડ-પે સહીતની માંગણી ન સંતોષાતા કર્મચારીઓ દ્વારા આંદોલનનું રણશીંગુ ફૂંકવામાં આવ્યું છે. આટલું જ નહીં સોમવારથી અચોકકસ મુદતની હડતાલની ચિમકી પણ ઉચ્ચારી છે. આઇએલઆર કચેરીના વર્ગ-૩ના કર્મચારીઓ માસ સીએલ પર જતાં શહેર-જિલ્લાની કચેરીમાં જમીન માપણી, પ્રોપર્ટી કાર્ડ, રી-સર્વે સહીતની મહત્વની કામગીરી ખોરંભે ચડતા દેકારો બોલી ગયો છે.
​​​​​​​
જામનગર સહીત રાજયભરમાં ઇન્સપેકટર ઓફ લેન્ડ રેકર્ડ એટલે કે આઇએલઆર  કચેરીના વર્ગ-૩ના કર્મચારીઓ દ્વારા ગ્રેડ-પેની માંગણી સાથે આંદોલનનું રણશીંગુ ફૂંકવામાં આવ્યું છે. જે અંતર્ગત તા.૧૧-૮ થી ૧૦-૯ દરમ્યાન આવેદન પત્ર પાઠવી ૩૦ દીવસમાં આ પ્રશ્ર્નનું નિરાકરણ કરવા માંગણી કરી હતી. આમ છતાં પ્રશ્ર્નનો ઉકેલ ન આવતા તા.૧૧-૯ થી ૧૮-૯ સુધી કચેરીમાં હાજર રહી પેનડાઉન કરી તમામ પ્રકારની કામગીરી બંધ કરી વિરોધ દર્શાવામાં આવ્યો હતો. પરંતુ આમ છતાં  સરકાર અને વડી કચેરી દ્વારા કોઇ નિર્ણય કરવામાં ન આવતા રાજ્યવ્યાપી લેવાયેલા નિર્ણય અનુસાર આજરોજ જામનગર શહેર-જિલ્લામાં કાર્યરત આઇએલઆર કચેરીમાં ફરજ બજાવતા વર્ગ-૩ના ૬૭ કર્મચારીઓએ માસ સીએલ એટલે કે સામૂહીક રજા પાડી હતી. આથી શહેર-જિલ્લાની તમામ આઇએલઆર કચેરીમાં જમીન માપણી, રી-સર્વે, પ્રોપર્ટી કાર્ડ, દીશા અને પ્લોટ માપણી, રીમાન્ડ અને હકકચોકસીના કેસ સહીતની મહત્વની કામગીરી બંધ રહી હતી. આથી અરજદારો અને ખેડૂતોમાં ભારે દેકારો બોલી ગયો છે. આટલું જ નહીં જો પ્રશ્ર્નોનો ઉકેલ નહીં આવે તો સોમવારથી વર્ગ-૩ના કર્મચારીઓએ અચોકકસ મુદતની હડતાળની ચિમકી ઉચ્ચારી છે. આથી જો આઇએલઆર કચેરીના વર્ગ-૩ના કર્મચારીઓ સોમવારથી અચોકકસ મુદતની હડતાળ પર જશે તો કચેરીમાં મહત્વની કામગીરી બંધ થતાં ખેડૂતો, પક્ષકારો અને અરજદારોને ભારે હાલાકીનો સામનો કરવો પડશે તેમાં બેમત નથી.