આટલું જ નહીં જે ખેડૂતોએ આગોતરૂ વાવેતર કર્યું હતું તેના ખેતરોમાં આવેલા કૂવા અને બોરમાં પાણી ડચકા ખાતા પિયતના અભાવે જેટલો ચોમાસુ પાક થયો છે તેમાં રોગચાળાની શકયતા નકારી શકાતી નથી. પાકને પાણી ન મળતા ડોડવા ખરી જવાની ભીતિ છે. આટલું જ નહીં પવનની ગતિ વધુ રહેતા પાણીના અભાવે પાકના ડોડવા સૂકાઇ જવાની શકયતા પણ છે. જિલ્લામાં દર વર્ષની જેમ આ વર્ષે પણ મુખ્ય પાક મગફળી અને કપાસનું વાવેતર વધુ થયું છે. જયારે કઠોળનું પણ વાવેતર અમુક ખેડૂતોએ કર્યું છે. પરંતુ ચોમાસુ પાક પર હાલતો વરસાદના વિલંબ, પિયતની સુવિધાનો અભાવના કારણે સંકટના વાદળો ઘેરાયા છે. જે ખેતરોમાં ચોમાસું પાક ઉભો છે તેને પિયતની તાતી જરૂર છે. આથી જો પંદેરક દીવસમાં વરસાદ નહીં આવે તો ચોમાસુ પાક નિષ્ફળ જવાની ભીતિ તેમણે વ્યકત કરી છે. આટલું જ નહીં શિયાળુ પાકના વાવેતરમાં પણ ભારે મુશ્કેલી પડશે તેમ પણ તેમણે જણાવ્યું હતું. 

વરસાદના અભાવે જમીનમાં ભેજની ખેંચ હોય ત્યાં ઉભા પાકને ટીપા-સ્પ્રીન્કલર પઘ્ધતિથી પીયત આપવું:
-મુખ્યપાક ચોમાસું મગફળીમાં મોલોમશી, નિંદામણ, સફેદફુગ, પાનના ટપકા  નો રોગ જોવા મળે તો જંતુનાશક દવાનો છંટકાવ, આંતરખેડ અને નિંદામણ કરવું.
-કપાસના ડાળી,ફુલમાં તડતડીયા, મોલો, સફેદ માખી, અલ્ટરનેરીઆ ફુગ જોવા મળે તો જંતુનાશક દવાનો છંટકાવ કરવો.
-તલમાં ફુલ-બૈઢામાં અલ્ટરનેરીઆ ફુગ, પાન વાળનાર ઇયળ, પાન કથીરી જોવા મળે તો જંતુનાશક દવાનો છંટકાવ કરવો અને તલમાં હળવી જમીનમાં હળવું પિયત કરવું.
-મગમાં ફુલ-શીંગમાં, અડદમાં ફુલ, ચોળીમાં ફુલ-શીંગમાં મોલોનો ઉપદ્રવ થાય તો જંતુનાશક દવાનો પાણીમાં મિકસ કરી છંટકાવ કરવો.
-દીવેલામાં ઉગાવો-વૃધ્ધિ દેખાય તો જમીનમાં ભેજ સંગ્રહ માટે દીવેલામાં આંતરખેડ અને નિંદામણ કરવું. ​​​​​​​