જામનગરમાં પાછળના તળાવ નજીક મેડીકલ વેસ્ટ અને કચરાના ગંજ 

મહાપાલીકાના શહેરને કચરામુકત બનાવવાના અભિયાન સામે ગંભીર પ્રશ્ર્નાર્થ

ખુલ્લેઆમ જાહેરમાં કચરાનો નિકાલ:રખડતા પશુઓ વધુ ગંદકી ફેલાવે છે
 
જામનગર શહેરની આગવી ઓળખ અને સુંદરતામાં મહત્વનું સ્થાન ધરાવતા તળાવ પૈકીના પાછળના તળાવની આસપાસ લાંબા સમયથી ગંદકીની સમસ્યા જોવા મળી રહી છે. ખાસ કરીને મિગ કોલોનીથી તુલસી ટ્રાવેલ સુધીના વિસ્તારમાં જાહેરમાં કચરો ઠાલવવામાં આવતો હોવાના કારણે સમગ્ર વિસ્તાર ગંદકીથી ખદબદી રહ્યો હોય મનપાના શહેરને કચરામુકત બનાવવાના અભિયાન સામે ગંભીર પ્રશ્ર્નાર્થ સર્જાયા છે.

સ્થાનિક લોકોના જણાવ્યા અનુસાર તળાવની પાછળના ભાગમાં આસપાસના કેટલાક હોસ્પિટલ, મેડિકલ સ્ટોર તથા અન્ય વ્યવસાયિક એકમોમાંથી નીકળતો કચરો જાહેરમાં નાખવામાં આવતો હોવાની ફરિયાદો ઉઠી રહી છે. જેના કારણે તળાવની આસપાસનો વિસ્તાર કચરાના ઢગલામાં ફેરવાઈ રહ્યો છે. જો બાયોમેડિકલ કચરો પણ સામાન્ય કચરા સાથે જાહેરમાં નાખવામાં આવતો હોય તો તે બાબત વધુ ગંભીર બની શકે તેમ છે અને સંબંધિત તંત્ર દ્વારા તેની તપાસ કરવી જરૂરી બની છે. જાહેરમાં પડેલા કચરામાં રખડતા પશુ મોઢું મારતા હોવાથી કચરો રસ્તા તથા આસપાસના વિસ્તારમાં વેરાઈ જાય છે. પરિણામે દુર્ગંધ, ગંદકી અને પ્રદૂષણની સમસ્યા વકરતી જાય છે. બીજી તરફ તળાવની સુંદરતા પણ ઝાંખી પડી રહી છે. શહેરના તળાવોનું જતન, સ્વચ્છતા અને સુંદરતા જાળવવા માટે મહાનગરપાલિકા દ્વારા વિવિધ પ્રયાસો કરવામાં આવે છે, ત્યારે શહેરના મહત્વના તળાવની પાછળના ભાગમાં આ પ્રકારે જાહેરમાં કચરો ઠાલવાતો રહે તે બાબત ગંભીર છે.  


આ વિસ્તારમાં નિયમિત સફાઈ કરાવવા ઉપરાંત જાહેરમાં કચરો નાખતા એકમો સામે તપાસ અને દંડાત્મક કાર્યવાહી કરવામાં આવે, કચરો નાખવાની જગ્યાઓ પર દેખરેખ રાખવામાં આવે તથા જરૂરી સ્થળોએ સીસીટીવી કેમેરા લગાવવામાં આવે તેવી સ્થાનિકોમાં માંગ ઉઠી છે. પાછળના તળાવની આસપાસની ગંદકીની સમસ્યાનો તાત્કાલિક ઉકેલ લાવી તળાવની સુંદરતા અને સ્વચ્છતા જાળવવા માટે મહાનગરપાલિકા તથા સંબંધિત વિભાગ દ્વારા અસરકારક કાર્યવાહી કરવામાં આવે તે જ‚રી બન્યું છે.