જામનગર: ભાડા અધિનિયમ-૨૦૨૬ના વિરોધ બાદ સરકાર સાથે સમાધાન

કાલાવડ બાર એસોસિએશને હડતાલ સમેટી કોર્ટ કામગીરી ફરી શરૂ કરી

ભાડા અધિનિયમ-૨૦૨૬માં કરવામાં આવેલી નવી જોગવાઈઓના વિરોધમાં કાલાવડ બાર એસોસિએશન દ્વારા અસંતોષ વ્યક્ત કરી કામગીરીથી અળગા રહેવાનો મહત્વપૂર્ણ નિર્ણય લેવામાં આવ્યો હતો. આ વિવાદાસ્પદ જોગવાઈઓ સામે વિરોધ નોંધાવી ગઈકાલે કાલાવડ બાર એસોસિએશન પણ રાજ્યભરના વકીલો સાથે જોડાઈને કોર્ટ કામગીરીથી અલિપ્ત રહ્યું હતું અને હડતાલ પાડી હતી.

જોકે, ગઈકાલે સાંજે બાર કાઉન્સિલ ઓફ ગુજરાત તેમજ બાર એસોસિએશનના તમામ સભ્યોની સરકાર સાથે એક મહત્વપૂર્ણ બેઠક યોજાઈ હતી. આ બેઠકમાં વકીલોની વિવિધ માંગણીઓ સંદર્ભે સકારાત્મક ચર્ચા-વિચારણા હાથ ધરવામાં આવી હતી અને સરકાર તરફથી વકીલોની માંગ પૂર્ણ કરવાની તેમજ આગામી દિવસોમાં તેનો સુચારુ ઉકેલ લાવવાની સ્પષ્ટ ખાતરી આપવામાં આવી હતી.

સરકાર સાથેની સફળ વાટાઘાટો બાદ હડતાલનો સુખદ અંત આવ્યો છે, જેના પગલે આજથી રાજ્યભર સહિત કાલાવડ બાર એસોસિએશનના વકીલોએ પણ હડતાલ પાછી ખેંચીને નિયમિત કોર્ટ કાર્યવાહી શરૂ કરી દીધી છે.