જામનગર: જોડિયાના જીરાગઢમાં જંગલી સુવરનો આતંક

બાઇકચાલક પ્રોઢ પર હુમલો કરી હાથ-પગમાં બચકાં ભર્યા, ગંભીર હાલતમાં રાજકોટ રિફર કરાયા

જોડિયા તાલુકાના જીરાગઢ ગામ અને આસપાસના ગ્રામ્ય વિસ્તારોમાં છેલ્લા કેટલાક સમયથી જંગલી સુવરોનો ઉપદ્રવ ચિંતાજનક રીતે વધી રહ્યો છે, ત્યારે ગઇકાલે સાંજના સુમારે સુવરે એક બાઇકસવાર પર જીવલેણ હુમલો કરતા ભારે ચકચાર મચી જવા પામી છે.
​​​​​​​
બનાવની વિગતો અનુસાર, જીરાગઢ ગામના રહેવાસી પોપટભાઈ બામણીયા ગઈકાલે સાંજના સમયે પોતાનું મોટરસાઇકલ લઈને રસ્તા પરથી પસાર થઈ રહ્યા હતા. તે દરમિયાન અચાનક ધસી આવેલા એક ખૂંખાર સુવરે તેમના પર હુમલો કરી દીધો હતો. અણધાર્યા હુમલાથી પોપટભાઈ બાઇક પરથી નીચે પટકાયા હતા અને સુવરે તેમના હાથ તેમજ પગના ભાગે ગંભીર રીતે બચકાં ભરી લઈ લોહીલુહાણ કરી મૂક્યા હતા.

આ હુમલાને પગલે પોપટભાઈએ બૂમાબૂમ કરતા આસપાસના ગ્રામજનો તાત્કાલિક ઘટનાસ્થળે દોડી આવ્યા હતા અને સુવરને ભગાડી તેમને બચાવ્યા હતા. ગંભીર રીતે ઈજાગ્રસ્ત થયેલા પોપટભાઈને તાબડતોબ સારવાર અર્થે ૧૦૮ કે ખાનગી વાહન મારફતે ધ્રોલની સરકારી હોસ્પિટલ ખાતે ખસેડવામાં આવ્યા હતા. જોકે, ત્યાં તેમની ઈજાઓ ગંભીર જણાતાં પ્રાથમિક સારવાર આપી વધુ સારવાર અર્થે રાજકોટની હોસ્પિટલમાં રિફર કરવામાં આવ્યા છે.

સ્થાનિક ગ્રામજનો અને ખેડૂતોના જણાવ્યા અનુસાર, જીરાગઢ અને તેની આસપાસના સીમ વિસ્તારોમાં જંગલી સુવરોનો ત્રાસ ખૂબ જ વધી ગયો છે. આ પ્રાણીઓ ખેતરોમાં ઊભા પાકને નુકસાન પહોંચાડવાની સાથે હવે માર્ગો પરથી પસાર થતા રાહદારીઓ અને વાહનચાલકો પર પણ હુમલા કરી રહ્યા છે, જેના કારણે લોકોમાં ભારે ભયનો માહોલ ફેલાયો છે. ગ્રામજનોએ વન વિભાગ સમક્ષ તાત્કાલિક આ વિસ્તારમાં પાંજરા મૂકી આ હિંસક સુવરોને પકડવાની અને યોગ્ય કાર્યવાહી કરવાની ઉગ્ર માંગ કરી છે.