ગુજરાતમાં આજના આધુનિક સમયમાં સંયુક્ત પરિવારની પરંપરાગત વ્યવસ્થા ખૂબ જ ઝડપથી બદલાઈ રહી છે અને તેની સૌથી મોટી તેમજ સીધી અસર વૃદ્ધોના જીવન પર જોવા મળી રહી છે. સંતાનો નોકરી-ધંધા અર્થે કે વિદેશમાં સ્થાયી થવાને કારણે એકલા પડતા માતા-પિતા માટે હવે વૃદ્ધાશ્રમો માત્ર નિરાધાર વૃદ્ધો માટેના આશ્રયસ્થાન રહ્યા નથી. શહેરોમાં ખાનગી, ટ્રસ્ટ સંચાલિત અને સિનિયર-કેર હોમ્સની સંખ્યા એટલી ઝડપથી વધી રહી છે કે દર પાંચ દિવસે સરેરાશ એક વૃદ્ધાશ્રમ નવું આકાર લઈ રહ્યું છે.

સામાન્ય રીતે અગાઉ વિશાળ જગ્યાઓ પર વૃદ્ધાશ્રમો જોવા મળતા હતા, પરંતુ હવે નાના-નાના પ્રાઈવેટ બંગલાઓમાં પણ સંખ્યાબંધ વૃદ્ધાશ્રમો ગુજરાતના મોટા શહેરોમાં સરળતાથી જોઈ શકાય છે. વર્ષ ૨૦૨૬ના બિઝનેસ-લિસ્ટિંગ ડેટા પ્રમાણે ગુજરાતમાં આશરે પ્રાઈવેટ અને સંસ્થાકીય મળીને ૩૭૬ જેટલા વૃદ્ધાશ્રમ, સિનિયર લિવિંગ અને સંબંધિત કેર સેન્ટર નોંધાયેલા છે. આ આંકડો દર્શાવે છે કે વૃદ્ધોની સંભાળનું આ ક્ષેત્ર ખૂબ જ ઝડપથી વિસ્તરી રહ્યું છે.

માત્ર બે વર્ષ પહેલાંના ઉપલબ્ધ અહેવાલોમાં આ પ્રકારની સંસ્થાઓની સંખ્યા ૨૩૫થી વધુ દર્શાવવામાં આવી હતી. આ બે વર્ષના ટૂંકા ગાળામાં ૧૪૦ જેટલી નવી સંસ્થાઓનો વધારો થયો છે, જેનાથી સ્પષ્ટ ટ્રેન્ડ દેખાય છે કે ગુજરાતમાં દર પાંચેક દિવસે એક નવી વૃદ્ધ સંભાળ સંસ્થા ઉમેરાઈ રહી છે. જોકે, આ ગણતરીને સત્તાવાર વૃદ્ધાશ્રમની સંખ્યા નહીં, પરંતુ ઉપલબ્ધ લિસ્ટિંગ આધારિત અંદાજ તરીકે જોવી જરૂરી છે.

આ સમગ્ર ટ્રેન્ડમાં અમદાવાદ શહેર સૌથી મોટું કેન્દ્ર બનીને ઉભર્યું છે. પહેલી એપ્રિલ ૨૦૨૬ના લિસ્ટિંગ ડેટા અનુસાર એકલા અમદાવાદમાં આશરે ૮૬, સુરતમાં ૬૩, વડોદરામાં ૪૮, રાજકોટમાં ૨૩ અને જૂનાગઢમાં ૧૭ સંસ્થાઓ દર્શાવવામાં આવી છે. આ ચારેય મોટા શહેરો (અમદાવાદ, સુરત, વડોદરા અને રાજકોટ) મળીને કુલ ૨૨૦ જેટલી સંસ્થાઓ થાય છે. આ ઉપરાંત ગુજરાત સરકારના સમાજ સુરક્ષા વિભાગની સત્તાવાર યાદીમાં પણ ભાવનગર, કચ્છ, દાહોદ, નર્મદા, પંચમહાલ, પાટણ અને સુરેન્દ્રનગર સહિતના વિવિધ જિલ્લાઓમાં વૃદ્ધાશ્રમોની વિગતો ઉપલબ્ધ છે.

અમદાવાદમાં એક સમય એવો હતો જ્યારે માત્ર ૧૫ જેટલા જ વૃદ્ધાશ્રમો હતા, જેની સંખ્યા સમય જતાં ૪૨ સુધી પહોંચી હતી. પરંતુ હવે વિવિધ ડિરેક્ટરીઓમાં ૮૬ જેટલી સંસ્થાઓ નોંધાયેલી છે. જોકે, આ યાદીમાં માત્ર પરંપરાગત ઓલ્ડ એજ હોમ જ નહીં, પરંતુ સિનિયર લિવિંગ, આસિસ્ટેડ લિવિંગ અને અન્ય આધુનિક કેર સેન્ટરોનો પણ મોટા પ્રમાણમાં સમાવેશ થાય છે.