મધ્યપ્રદેશના શિવપુરીમાં દેવ દર્શન માટે જઈ રહેલા ભક્તોની હોડી પલટી જતા આ અકસ્માતમાં સાત લોકોના મોતની આશંકા છે. ઘટનાની જાણ થતા જ બચાવ કાર્ય શરુ કરી દેવામાં આવ્યું હતું. પિચોરના એસડીઓપી પ્રશાંત શર્માએ જણાવ્યું હતું કે ફાગ હોળી માટે 15 શ્રદ્ધાળુઓ શિવપુરી જિલ્લાના ખાનિયાધના પોલીસ સ્ટેશન વિસ્તારમાં માતા ટીલા ડેમની મધ્યમાં એક ટાપુ પર સ્થિત સિદ્ધ બાબા મંદિરમાં હોડીમાં જઈ રહ્યા હતા. આ દરમિયાન, બોટમાં પાણી ઘૂસી ગયું અને બોટ પલટી ગઈ. મધ્યપ્રદેશના મુખ્યમંત્રી ડૉ. મોહન યાદવે આ ઘટનામાં મૃતકોના પરિવારજનોને 2 લાખ રૂપિયાની આર્થિક સહાયની જાહેરાત કરી છે.

આ ઘટના બાદ લોકોની મદદથી 8 શ્રદ્ધાળુઓને બહાર કાઢવામાં આવ્યા હતા, જ્યારે સાત લોકોનો કોઈ પત્તો લાગ્યો ન હતો. આમાં ચાર બાળકો અને ત્રણ મહિલાઓ હોવાનું કહેવાય છે. એનડીઆરએફ ટીમ અને સ્થાનિક લોકોની મદદથી લોકોને શોધવામાં આવી રહ્યા છે. એવી આશંકા છે કે ગુમ થયેલા લોકોના બચવાની શક્યતા ખૂબ ઓછી છે.

દરમિયાન, મધ્યપ્રદેશના મુખ્યમંત્રી ડૉ. મોહન યાદવે આ ઘટના પર દુઃખ વ્યક્ત કર્યું છે. તેમણે મૃતકોના નજીકના સગાને મુખ્યમંત્રી સ્વૈચ્છિક ગ્રાન્ટમાંથી 2 લાખ રૂપિયાની નાણાકીય સહાય આપવા સૂચનાઓ જારી કરી છે. આ ઘટના અંગે કેન્દ્રીય મંત્રી જ્યોતિરાદિત્ય સિંધિયાએ શિવપુરી કલેક્ટર, એસપી સાથે વાત કરી અને રાહત કાર્ય ઝડપી બનાવવાના નિર્દેશો પણ આપ્યા.

8 લોકોનો બચાવ

મુખ્યમંત્રી ડૉ. મોહન યાદવે જિલ્લા વહીવટીતંત્ર, સ્થાનિક નાગરિકો અને એનડીઆરએફ કર્મચારીઓની મદદથી લોકોને સુરક્ષિત રીતે બચાવવા બદલ સંતોષ વ્યક્ત કર્યો છે. તેમણે એમ પણ કહ્યું કે ભવિષ્યમાં આવી ઘટનાઓ ન બને તે માટે જિલ્લા વહીવટીતંત્રને સૂચનાઓ જારી કરવામાં આવી છે.શિવપુરીના એસપી અમન સિંહ રાઠોડે જણાવ્યું હતું કે જિલ્લા વહીવટીતંત્ર અને પોલીસની હાજરીમાં સર્ચ ઓપરેશન હાથ ધરવામાં આવી રહ્યું છે. પાણીમાં મરજીવાઓ ગુમ થયેલા લોકોને શોધી રહ્યા છે. તેમાં શિવ, કાન્હા, છાયા, કુમકુમ નામના ચાર બાળકોનો સમાવેશ થાય છે જ્યારે શારદબાઈ, લીલાબાઈ અને રામદેવી નામની ત્રણ મહિલાઓની પણ શોધ ચાલી રહી છે.