રિલાયન્સ ગ્રૂપના અનંત અંબાણી દ્વારકાની પદયાત્રાએ નીકળ્યા તેનો આજે સાતમો દિવસ હતો. એક યુવતી અનંત અંબાણીને મળતા તેમની આંખોમાંથી દડદડ આંસુ સરી પડ્યા હતા. આ સમયે ભાવુક દૃશ્યો સર્જાયા હતા. જ્યારે એક યુવક મારવાડી ઘોડો લઈ અનંત અંબાણીને મળવા પહોંચ્યો હતો. મારવાડી ઘોડો જોતા જ અનંત અંબાણી રાજી રાજી થઈ ગયા હતા અને ઘોડાના વખાણ કર્યા હતા.

આજે રાત્રે ત્રણ વાગ્યે અનંત અંબાણીએ ગુરગઢ નજીકના લીમડી ગામ પાસેથી યાત્રા શરૂ કરીને સવારે 8 વાગ્યે મહાદેવડિયા ગામ નજીક પહોંચ્યા હતા. સાત દિવસમાં અનંત અંબાણીએ 71 કિં.મી. જેટલું અંતર કાપ્યું છે. 

ભલે તમ તમારે એક દિવસ વનતારા આવજો
રસ્તા ઉપર ઓમ હોટલ નજીક અનંતને મળવા આવેલી ઉષા નામની એક યુવતી રડી પડી હતી. ત્યારે અનંતે પ્રેમથી એની સાથે વાતચીત કરીને સાથે ફોટો પડાવ્યો હતો. ઉષાએ જણાવ્યું હતું કે, અનંત સાહેબને મળી તો મને હરખનાં આંસુ આવી ગયાં હતાં. મેં એમને ફોટો ગિફ્ટમાં આપ્યો છે. મેં અનંતસરને કહ્યું કે, મારે વનતારા જોવા આવવું છે. તો અનંત સાહેબે કીધું કે, ભલે તમ તમારે એક દિવસ વનતારા આવજો.

ઘોડા સાથે યુવક અનંત અંબાણીને મળવા આવ્યો
જામખંભાળિયાથી અર્જુનસિંહ જાડેજા નામનો યુવક મારવાડી બ્રિડનો ઘોડો લઇને અનંત અંબાણીને મળવા આવ્યો હતો. જે અનંત અંબાણીને મળ્યો તો અનંત અંબાણીએ ઘોડાનું નામ પૂછ્યું હતું અને સાથે ફોટો પડાવ્યો હતો.