બાળકીએ ચિસાચીસ કરી મુકતાં બે મહિલાઓએ દોડી આવી શ્વાનના કબજામાંથી બાળકીને મુક્ત કરાવી​​​​​​​

જામનગર માં જોડીયા ભુંગા વિસ્તારમાં પરમદિને બપોરે પગપાળા ચાલીને જઈ રહેલી એક દસ વર્ષની માસૂમ બાળકી પર બે રસ્તે રઝળતા શ્વાનોએ નિશાન બનાવી લીધી હતી, અને માસુમ બાળકીને પિંખી નાખી હતી. જે ઘટનાથી ભારે હડકંપ મચી ગયો હતો.

પોતાના ઘર પાસેથી નીકળીને બાળકી આંગણવાડી પાસેથી પસાર થઈ રહી હતી, દરમિયાન બન્ને શ્વાન ધસી આવ્યા હતા, અને બાળકીને બટકા ભરવાનું શરૂ કર્યું હતું, જેથી તેણીએ ભારે ચીસા ચીસ કરી મૂકી હતી.

દરમિયાન આસપાસના વિસ્તારમાં રહેતી બે મહિલાઓ દોડી આવી હતી, અને બાળકીને શ્વાના કબજા માંથી છોડાવી લીધી હતી, અને શ્વાનને ભગાડી મૂક્યા હતા, જેથી બાળકી નો બચાવ થયો હતો.

જો કે તેણી ઇજાગ્રસ્ત બની હોવાથી જામનગરની સરકારી જીજી હોસ્પિટલમાં પ્રાથમિક સારવાર આપવી પડી હતી. જો કે હાલ બાળકી ભયમુક્ત છે. ઉપરોક્ત વિસ્તારમાં આંગણવાડી આવેલી હોવાથી તે આંગણવાડીના સીસીટીવી કેમેરામાં સમગ્ર ઘટના કેદ થઈ હોવાથી તેનો વિડીયો ગઈકાલે સમગ્ર દિવસ દરમિયાન વાયરસ થયો હતો.