પુત્રને ધમકી દીધી, પુત્રીને ફડાકો માર્યો : ઘરમાં સામાનની તોડફોડ કરી

જામનગરના એસટી ડીવીઝન પાછળ અલસફા સોસાયટીમાં વાપરવાના પૈસા નહીં આપતા ઉશ્કેરાયેલા શખ્સે પુત્રને ધમકી દીધી હતી અને પુત્રીને ફડાકા માયર્િ હતા તેમજ ઘરમાં નુકશાન પહોચાડીને નાશી જતા મામલો પોલીસમાં લઇ જવામાં આવ્યો હતો.

જામનગરમાં કાલાવડ નાકા બહાર અલસફા સોસાયટીમાં રહેતા અને કલર કામની મજૂરી કરતા સરફરાજખાન સલીમખાન લોદીન નામના 25 વર્ષના પઠાણ યુવાને પોતાને મારી નાખવાની ધમકી આપી પોતાની બહેનને થપ્પડો મારવા તેમજ તલવાર વડે ઘરમાં તોડફોડ કરી નાખી નુકસાન પહોંચાડવા અંગે પોતાના પિતા સલીમખાન કરીમખાન લોદિન (રહે. નવાગામ ઘેડ) સામે સીટી એ. ડિવિઝન પોલીસ મથકમાં ફરિયાદ નોંધાવી છે.

પોલીસ ફરિયાદમાં જાહેર કરાયા અનુસાર આરોપી સલીમખાન છેલ્લા કેટલાક વર્ષોથી પોતાના પરિવારથી અલગ નવાગામ ઘેડમાં રહે છે. જેણે પોતાના પુત્ર અને પત્ની પાસેથી વાપરવા માટેના પૈસાની માંગણી કરી હતી, પરંતુ પુત્રએ પૈસા આપવાનો ઇનકાર કઈ દેતાં સલીમખાન તલવાર સાથે તેમના ઘેર ધસી આવ્યો હતો, અને  ઘરમાં ચીજ વસ્તુઓમાં તોડફોડ કરી નાખી 21,000નું નુકસાન પહોંચાડ્યું હતું.

આ વેળાએ ઘરમાં હાજર રહેલી ફરીયાદીની બહેન મોઇનબાનુંને થપપ્ડો ઝીંકી દીધી હતી તેમજ ફરીયાદીને જાનથી મારી નાખવાની ધમકી દીધી હતી.