માડાગાસ્કર ને વિશ્વના સૌથી ગરીબ દેશોમાંનો એક માનવામાં આવે છે. અહીં ગરીબીનો દર ઊંચો છે અને વિકાસના નોંધપાત્ર પડકારોનો સામનો કરવો પડે છે. આ ગરીબ દેશમાં બળવા પછી રાષ્ટ્રપતિ મહેલમાંથી 300 કિલોગ્રામ વજનનો કિંમતી રત્ન મળી આવ્યો હોઈ તેવું માનવામાં આવે નહી પરંતુ આ વાત સાચી છે. માડાગાસ્કરના કાર્યકારી રાષ્ટ્રપતિ, કર્નલ મિશેલ રેન્ડ્રિયાનિરીનાએ ગયા મહિને હિંદ મહાસાગર ટાપુ રાષ્ટ્રમાં સત્તા સંભાળી હતી. હવે, તેમણે વિશ્વ સમક્ષ 300 કિલોગ્રામ (661 પાઉન્ડ) વજનનો રત્ન હોવાનું જાહેર કર્યું છે, જે તેમણે કહ્યું હતું કે રાષ્ટ્રપતિ મહેલમાં મળી આવ્યો હતો.

અહેવાલ મુજબ, ચમકતા લીલા સ્ફટિકોથી શણગારેલો આ કાળો પથ્થર, મંગળવાર, 18 નવેમ્બરની સાંજે રાજધાની, અંતાનાનારીવોમાં રાષ્ટ્રપતિ મહેલ - અમ્બોહિતસોરોહિત્રા સ્ટેટ પેલેસ - ની અંદર અનાવરણ કરવામાં આવ્યો હતો. આ પથ્થરને "નીલમણિ" તરીકે વર્ણવવામાં આવ્યો છે. અંદર જડેલા નીલમણિનું કદ અને ગુણવત્તા નક્કી કરવા માટે હજુ પણ નિષ્ણાત વિશ્લેષણની જરૂર છે.

તેમણે સંપૂર્ણ પારદર્શિતાનું વચન આપતા કહ્યું કે તેને વેચી શકાય છે અને દેશની તિજોરીમાં વધારો કરી શકાય છે. જોકે, તેમણે કિંમતી પથ્થર કેવી રીતે, ક્યારે અથવા ક્યાંથી મળ્યો તે અંગે કોઈ વિગતો આપી ન હતી. તેમણે ફક્ત એટલું જ કહ્યું, "રાષ્ટ્રપતિ મહેલની મુલાકાત લીધા પછી અમને આ અદ્ભુત રાષ્ટ્રીય ખજાનો મળ્યો, અને અમને ખબર નથી કે તેને અહીં શા માટે લાવવામાં આવ્યો. અહેવાલ મુજબ, માડાગાસ્કરના ખાણ મંત્રી, કાર્લ એન્ડ્રિયામાપારેનીએ, આ રત્નને કોઈપણ કલેક્ટરનું સ્વપ્ન ગણાવ્યું. "આ તેના કુદરતી મેટ્રિક્સ સાથે એક દુર્લભ નીલમણિ છે," તેમણે કહ્યું. તેમણે ઉમેર્યું કે અધિકારીઓને માડાગાસ્કરમાં ક્યારેય સમાન પથ્થરનો કોઈ રેકોર્ડ મળ્યો નથી. સરકારે કહ્યું કે તેના વેચાણમાંથી મળેલી રકમ રાષ્ટ્રીય તિજોરીમાં જમા કરવામાં આવશે.