રાજકોટના રૈયાધાર વિસ્તારમાં રહેતો યુવાન બે મિત્રો સાથે ન્યારી ડેમ પાછળ આવેલી નદીમાં નાહવા ગયો હતો. દરમિયાન અહીં ઊંડા પાણીમાં ગરક થઈ જતા તેનું મોત થયું હતું.બનાવના પગલે ફાયરના સ્ટાફે અહીં પહોંચી યુવાનના મૃતદેહને બહાર કાઢ્યો હતો. લોધિકા પોલીસે મૃતદેહને પીએમ માટે હોસ્પિટલ ખસેડી જરૂરી કાર્યવાહી કરી હતી.

જાણવા મળતી વિગતો મુજબ, ગઈકાલ સાંજના ન્યારી ડેમ નજીક આવેલી નદીમાં યુવાન ડૂબી ગયો હોવાની રાજકોટ ફાયર બ્રેગેડને જાણ કરવામાં આવતા ફાયર બ્રિગેડની ટીમ તુરંત અહીં પહોંચી હતી. અને યુવાનના મૃતદેહને પાણીમાંથી બહાર કાઢ્યો હતો. બનાવના પગલે 108 અને લોધિકા પોલીસ મથકનો સ્ટાફ પણ પહોંચી ગયો હતો. પોલીસે જરૂરી કાર્યવાહી કરી મૃતદેહને પીએમ માટે હોસ્પિટલ ખસેડ્યો હતો.

વધુમાં જાણવા મળતી વિગતો મુજબ, મૃતક યુવાનનું નામ અજય રાજુભાઈ સામેચા (ઉ.વ 25 રહે. રામાપીર ચોકડી પાસે, પાણીના ટાંકાની સામે રૈયાધાર) હોવાનું માલુમ પડ્યું હતું.યુવાન તેના મિત્ર પ્રવીણ અને બાઉં સાથે અહીં નદીએ નાહવા માટે આવ્યો હતો.દરમિયાન તે નદીના ઊંડા પાણીમાં ગરક થઈ જતા તેનું મોત થયું હતું. યુવાન મજૂરીકામ કરી પરિવારનું ગુજરાન ચલાવતો હોવાનું અને તેને સંતાનમાં એક પુત્ર હોવાનું માલુમ પડ્યું છે.