ગુજરાત રાજપૂત સંસ્થાઓની સંકલન સમિતિ (કોર કમિટી) દ્વારા ચૂંટણી પૂર્ણ પછી આજે પ્રથમ મીટીંગનું આયોજન કરાયું હતુ. મીટીંગ બાદ પ્રેસ કોન્ફરન્સ કરવામાં આવી હતી. આ પ્રેસવાર્તામાં ક્ષત્રિયસમાજનું આંદોલન પૂર્ણ થયાની જાહેરાત કરવામાં આવી છે. 

મળતી માહિતી પ્રમાણે ક્ષત્રિય સંકલન સમિતિએ જાહેરાત કરી છે કે, પરશોત્તમ રૂપાલા સામેનું આંદોલન હાલમાં સ્થગિત કરવામાં આવે છે. ક્ષત્રિય સમાજે પરશોત્તમ રૂપાલાની વિરુદ્ધ મતદાન કર્યું છે. રાજકોટ બેઠક પરથી પરશોત્તમ રૂપાલા હારશે તેવો વિશ્વાસ સંકલન સમિતિના કરણસિંહે વ્યક્ત કર્યો હતો.

કરણસિંહે વધુમાં જણાવ્યું હતુ કે, અમને વિશ્વાસ છે કે રાજકોટ બેઠક પર રૂપાલાનો પરાજય થશે. અત્યારે અમે આંદોલનને વિરામ આપી રહ્યા છીએ. અમારા અગ્રણીઓને રંજાડવામાં આવશે તો અમે ફરીવાર આક્રમક થઈ સામે આવીશું.