રિઝર્વ બેંક ઓફ ઈન્ડિયા દ્વારા તેના બેન્ચમાર્ક પોલિસી રેટમાં વધારો કર્યાના થોડા કલાકો બાદ, પંજાબ નેશનલ બેંક, બેંક ઓફ બરોડા અને ઈન્ડિયન બેંક સહિતની મુખ્ય ધિરાણકર્તા સંસ્થાઓએ તેમના ધિરાણ દરોમાં વધારો કરવાની જાહેરાત કરી હતી, જેનાથી લોન લેનારાઓ માટે લોન મોંઘી બની છે.

મધ્યસ્થ બેંકે સાતમી ઓક્ટોબરના રોજ તેના મુખ્ય રેપો રેટમાં 25 બેઝિસ પોઈન્ટનો વધારો કરીને તેને 5.50 ટકા કર્યો છે. જે લગભગ ચાર વર્ષમાં વ્યાજદરમાં થયેલો પ્રથમ વધારો છે. આરબીઆઈએ એવો સંકેત પણ આપ્યો કે વ્યાજદરમાં વધુ વધારો થઈ શકે છે, કારણ કે વધતો જતો ફુગાવો અને સ્થાનિક ચલણના મૂલ્યમાં થતો ઘટાડો નીતિગત વલણમાં ફેરફાર કરવા માટે જવાબદાર પરિબળો બન્યા છે.

આ નિર્ણય છ સભ્યોની મોનેટરી પોલિસી કમિટી દ્વારા લેવામાં આવ્યો હતો, જેણે રેપો રેટમાં વધારો કરવા માટે સર્વસંમતિથી મતદાન કર્યું હતું. ડિસેમ્બર ૨૦૨૪માં ગવર્નર સંજય મલ્હોત્રાએ પદ સંભાળ્યા બાદ તેમના કાર્યકાળ દરમિયાન વ્યાજ દરમાં થયેલો આ પ્રથમ વધારો છે. જોકે બજારના સહભાગીઓને વ્યાજ દરમાં વધારાની વ્યાપક અપેક્ષા હતી, તેમ છતાં મધ્યસ્થ બેંકે પોતાની નીતિગત સ્થિતિ બદલીને 'કેલિબ્રેટેડ ટાઈટનિંગ' (નિયંત્રિત કડકાઈ) અપનાવીને નિરીક્ષકોને ચોંકાવી દીધા હતા; આ પગલાથી નજીકના ભવિષ્યમાં વ્યાજ દરમાં ઘટાડાની શક્યતા લગભગ સમાપ્ત થઈ ગઈ છે.

પંજાબ નેશનલ બેંકે એક નિયમનકારી ફાઇલિંગમાં જણાવ્યું હતું કે, આરબીઆઈ દ્વારા રેપો રેટમાં કરવામાં આવેલા વધારાને પગલે, તેણે આઠમી ઓક્ટોબરથી અમલમાં આવે તે રીતે તેના 'રેપો લિંક્ડ લેન્ડિંગ રેટ' (આરએલએલઆર)ને 8.10 ટકા (જેમાં 0.35ટકા બીએસપીનો સમાવેશ થાય છે)થી વધારીને 8.35 ટકા કર્યો છે. જોકે, પીએનબીએ સ્પષ્ટ કર્યું હતું કે તેના 'માર્જિનલ કોસ્ટ ઓફ ફંડ્સ બેઝ્ડ લેન્ડિંગ રેટ' (એમસીએલઆર) અને 'બેઝ રેટ'માં કોઈ ફેરફાર કરવામાં આવ્યો નથી.

બેંક ઓફ બરોડા (બીઓબી)એ તેના રેપો-આધારિત ધિરાણ દર (આરબીએલઆર)માં 25 બેઝિસ પોઈન્ટનો વધારો કર્યો છે, જેનાથી તે 7.90 ટકાથી વધીને 8.15 ટકા થયો છે. તેવી જ રીતે, ચેન્નાઈ સ્થિત ઈન્ડિયન બેંકે પણ તેના રેપો-લિંક્ડ બેન્ચમાર્ક લેન્ડિંગ રેટ (આરબીએલઆર)ને 7.95 ટકાથી વધારીને 8.20 ટકા કર્યો છે, જેનો અમલ આઠમી ઓક્ટોબરથી થયો છે.

બેંક ઓફ ઈન્ડિયા (બીઓઆઈ) અને ઈન્ડિયન ઓવરસીઝ બેંક (આઈઓબી) બંનેએ આઠમી ઓક્ટોબરથી અમલમાં આવે તે રીતે તેમના આરબીએલઆર (રેપો લિંક્ડ લેન્ડિંગ રેટ)માં વધારો કરીને તેને 8.35 ટકા કર્યો છે. બીઓઆઈએ એક નિયમનકારી સૂચનામાં આ ફેરફારની પુષ્ટિ કરી હતી અને તેનું કારણ મધ્યસ્થ બેંક દ્વારા નીતિગત દરમાં કરવામાં આવેલો વધારો દર્શાવ્યો હતો.

ખાનગી બેંકિંગ ક્ષેત્રે, તમિલનાડ મર્કન્ટાઇલ બેંકે તેનો આરએલએલઆર 8.25 ટકાથી વધારીને 8.50 ટકા કર્યો છે. આગામી દિવસોમાં જાહેર અને ખાનગી ક્ષેત્રની અન્ય ધિરાણકર્તા સંસ્થાઓ પણ વ્યાજદરમાં આવા જ ફેરફારો કરે તેવી અપેક્ષા છે.