આજકાલ સોશિયલ મીડિયા અને પત્રો દ્વારા લોકોમાં એક લોન એપ્રુવલ લેટર વાયરલ થઈ રહ્યો છે. આ પત્રમાં દાવો કરવામાં આવે છે કે મુદ્રા યોજના હેઠળ તમારી ૫ લાખ રૂપિયાની લોન પાસ થઈ ગઈ છે. આ મોટી રકમ જોઈને લોકો લલચાઈ જાય છે અને છેતરપિંડીનો શિકાર બને છે.

કેવી રીતે ફસાવવામાં આવે છે લોકોને?
જાલસાજોની આ પદ્ધતિ અત્યંત શાતિર છે. જેમાં લોકોને એક પત્ર મોકલવામાં આવે છે જે દેખાવમાં સરકારી દસ્તાવેજ જેવો હોય છે. પત્રમાં શરત રાખવામાં આવે છે કે લોનની રકમ ખાતામાં ટ્રાન્સફર કરવા માટે માત્ર ૩૫૦ રૂપિયા 'પ્રોસેસિંગ ફી' તરીકે જમા કરાવવા પડશે. ૫ લાખ રૂપિયા જેવી મોટી રકમ સામે ૩૫૦ રૂપિયાની ફી બહુ ઓછી લાગતી હોવાથી સામાન્ય માણસ સરળતાથી ફસાઈ જાય છે.

PIB ફેક્ટ ચેક દ્વારા ખુલાસો
પ્રેસ ઇન્ફોર્મેશન બ્યુરો (PIB) એ આ વાયરલ લેટરની તપાસ કરી તેને સંપૂર્ણપણે નકલી જાહેર કર્યો છે. સરકાર દ્વારા સ્પષ્ટ કરવામાં આવ્યું છે કે મુદ્રા યોજના અંતર્ગત આવો કોઈ પણ પત્ર જારી કરવામાં આવ્યો નથી. છેતરપિંડી કરનારાઓ સરકારી યોજનાઓ પ્રત્યે લોકોના વિશ્વાસનો દુરુપયોગ કરીને પૈસા પડાવવાનો પ્રયાસ કરી રહ્યા છે.

મુદ્રા યોજનાનો અસલી નિયમ શું છે?
PIB એ આ મામલે સ્પષ્ટતા કરતા જણાવ્યું છે કે મુદ્રા યોજના સીધી રીતે લોન આપતી નથી.  'મુદ્રા' (MUDRA) એ સીધી રીતે કોઈ વ્યક્તિને લોન આપતી સંસ્થા નથી પરંતુ તે એક રીફાઇનાન્સિંગ એજન્સી છે. મુદ્રા સંસ્થા બેંકો અને નાણાકીય કંપનીઓને ભંડોળ પૂરું પાડે છે, અને ત્યારબાદ તે બેંકો સામાન્ય જનતાને લોન આપે છે. જો સીધા મુદ્રાના નામે તમારી પાસે કોઈ ઓફર આવે, તો તે ૧૦૦ ટકા છેતરપિંડી છે.

​​​​​​​સાવચેતીના પગલાં
ડિજિટલ યુગમાં સાવધાની જ સુરક્ષા છે. 
- કોઈપણ અજાણ્યા વ્યક્તિ કે સંસ્થાને નાની રકમ પણ ટ્રાન્સફર ન કરો.
- તમારી બેંક વિગતો કે ખાનગી ડેટા કોઈની સાથે શેર ન કરો.
- સરકારી યોજનાઓની સત્તાવાર માહિતી હંમેશા અધિકૃત સ્ત્રોત અથવા નજીકની બેંક શાખામાંથી જ મેળવો.
- થોડીક જાગૃતિ તમને મોટા આર્થિક નુકસાનથી બચાવી શકે છે.