સૌરાષ્ટ્રના પાટનગર ગણાતા રાજકોટમાં ગુનેગારો હવે બેફામ બન્યા હોય તેમ લાગી રહ્યું છે. શહેરના રૈયા ધાર સ્થિત જલારામ ચોક પાસે ધોળે દિવસે એક એવી ઘટના બની જેણે સ્થાનિકોના કાળજા કંપાવી દીધા છે. સોશિયલ મીડિયા પર વાયરલ થયેલા આ દ્રશ્યો જોઈને એક ક્ષણ માટે એવું લાગે કે આ દ્રશ્યો બિહારના કોઈ પછાત વિસ્તારના છે, પરંતુ હકીકતમાં આ ઘટના 'રંગીલા' રાજકોટની જ છે.

શું છે સમગ્ર ઘટના?

મળતી માહિતી મુજબ, રૈયા ધાર વિસ્તારમાં કેટલાક અજાણ્યા હુમલાખોરોએ એક યુવકને નિશાન બનાવ્યો હતો. હુમલાખોરોએ પૂર્વ આયોજિત કાવતરાના ભાગરૂપે યુવક પર તીક્ષ્ણ હથિયારો વડે ઘાતકી હુમલો કર્યો હતો. લોહીલુહાણ હાલતમાં યુવક જીવ બચાવવા કરગરી રહ્યો હતો, છતાં હુમલાખોરોનું દિલ પીગળ્યું નહોતું.

ભરબજારમાં બનેલી આ ઘટનામાં હુમલાખોરોનો આતંક એટલો હતો કે આસપાસના લોકો પણ તેમને રોકવાની હિંમત કરી શક્યા નહોતા. હુમલા બાદ યુવક જ્યારે બેશુદ્ધ અને લોહીથી લથબથ હાલતમાં હતો, ત્યારે હુમલાખોરો તેને ફિલ્મી ઢબે કારમાં ઉઠાવીને (અપહરણ કરીને) ફરાર થઈ ગયા હતા.

રસ્તામાં ફેંકીને ફરાર

પોલીસ અને સૂત્રો પાસેથી મળતી વિગત મુજબ, અપહરણ કર્યા બાદ હુમલાખોરો યુવકને કારમાં લઈ ગયા હતા, પરંતુ થોડા અંતર બાદ યુવકની ગંભીર હાલત જોઈને તેને રસ્તામાં ફેંકીને નાસી છૂટ્યા હતા. ઈજાગ્રસ્ત યુવકને તાત્કાલિક સારવાર અર્થે હોસ્પિટલમાં ખસેડવામાં આવ્યો છે, જ્યાં તેની હાલત અત્યંત નાજુક હોવાનું જાણવા મળી રહ્યું છે.

પોલીસ તપાસનો ધમધમાટ

આ ઘટનાના સીસીટીવી ફૂટેજ અને મોબાઈલ વીડિયો વાયરલ થતા જ પોલીસ તંત્ર હરકતમાં આવ્યું છે. સ્થાનિક પોલીસે હુમલાખોરોની ઓળખ મેળવવા અને તેમને ઝડપી પાડવા માટે અલગ-અલગ ટીમો બનાવી છે. પ્રાથમિક દ્રષ્ટિએ આ હુમલો જૂની અદાવત અથવા અંગત દુશ્મનાવટના કારણે થયો હોવાનું મનાઈ રહ્યું છે.