પ્રાપ્ત વિગત મુજબ ચોટીલામાં આણંદપર રોડ પર રહેતા પંકજભાઈ મોહનભી ગોહેલ (ઉ.વ.40)ના બપોરે ચારેક વાગ્યે પોતાનું મોટર સાઇકલ લઈ ચોટીલાથી રાજકોટ આવતા હતા ત્યારે બામણબોર ચેક પોસ્ટથી ગુંદાળા ગામ પાસે પહોંચતા પાછળથી આવતી બોલેરો કારનું એકાએક ટાયર ફાટતા ચાલકે સ્ટિયરિંગ ઉપરનો કાબુ ગુમાવી દેતા આગળ જતી મોટર સાઈકલ સાથે અથડાતા પંકજભાઈ મોટર સાઈકલ સમેત પટકાતા માથા અને શરીરના ભાગે ગંભીર ઇજા થઇ હતી. અકસ્માતના પગલે આસપાસના લોકો દોડી આવ્યા હતા અને 108 મારફતે સિવિલ હોસ્પિટલમાં ખસેડવામાં આવતા ટૂંકી સારવાર દરમિયાન મોત નીપજ્યું હતું. બનાવના પગલે હોસ્પિટલ ચોકીના સ્ટાફે એરપોર્ટ પોલીસને જાણ કરતા પોલીસે હોસ્પિટલ પહોંચી જરૂરી કાગળો કરી કાર્યવાહી કરી હતી.

મૃતક યુવાન ત્રણ ભાઈ બે બહેનમાં બીજા નંબરે હતા અને છૂટક મજૂરી કામ કરી એકલા રહેતા હતા. કોઈ કામ સબબ ચોટીલાથી રાજકોટ આવતા હતા ત્યારે અકસ્માત નડ્યો હતો. આગળની કાર્યવાહી એરપોર્ટ પોલીસે હાથ ધરી છે.