અમેરિકામાં ભારતીય મૂળના એક લેબોરેટરી માલિક પર ૬૬.૨ મિલિયન ડોલર (આશરે રૂ.૬૨૮.૭ કરોડ)ની કથિત છેતરપિંડી આચરવાનો આરોપ મૂકવામાં આવ્યો છે. યુએસ ડિપાર્ટમેન્ટ ઓફ જસ્ટિસના એક નિવેદન અનુસાર, તેમણે ૩.૮ લાખ કોવિડ-૧૯ ટેસ્ટ માટે બિલિંગ કર્યું હતું, જે તેમની લેબોરેટરીમાં ક્યારેય કરવામાં જ આવ્યા ન હતા.

ઇલિનોઇસના શૉમ્બર્ગના રહેવાસી, બાવન વર્ષીય રાજેશ ઉર્ફે રાજ પટેલ સામે વાયર ફ્રોડ (ઇલેક્ટ્રોનિક માધ્યમથી છેતરપિંડી)ના પાંચ આરોપો મૂકવામાં આવ્યા છે. જો તેઓ દોષિત ઠરે તો દરેક આરોપ માટે તેમને ૨૦ વર્ષ સુધીની જેલની સજા થઈ શકે છે.

મે ૨૦૨૧ અને એપ્રિલ ૨૦૨૨ની વચ્ચે, પટેલે કથિત રીતે મેરિડિયન મેડિકલ સ્ટાફિંગ ઇન્ક. સાથે સંકળાયેલા નમૂનાઓ માટે ૩.૮ લાખ નકલી નેગેટિવ ટેસ્ટ રિપોર્ટ તૈયાર કર્યા હતા. ન્યાય વિભાગના નિવેદન અનુસાર, ત્યારબાદ તેમણે આ પરીક્ષણો માટે યુએસ હેલ્થ રિસોર્સીસ એન્ડ સર્વિસીસ એડમિનિસ્ટ્રેશનના 'અનઇન્શ્યોર્ડ પ્રોગ્રામ' (વીમારહિત વ્યક્તિઓ માટેનો કાર્યક્રમ) હેઠળ બિલ રજૂ કર્યું હતું.

ફેડરલ ભંડોળ દ્વારા ચલાવવામાં આવતા આ કાર્યક્રમમાં, જે લોકો પાસે સ્વાસ્થ્ય વીમો ન હતો તેમના માટે કોવિડ-19 પરીક્ષણનો ખર્ચ આવરી લેવામાં આવતો હતો. સરકારી વકીલોનો આરોપ છે કે પટેલ, જેઓ ઇલિનોઇસના હિલસાઇડમાં આવેલી એક ક્લિનિકલ લેબોરેટરીના ચીફ ઓપરેટિંગ ઓફિસર પણ હતા, તેમણે ફેડરલ કાર્યક્રમ હેઠળ ચૂકવણી મેળવવા માટે ખોટા 'નેગેટિવ' પરીક્ષણ પરિણામો તૈયાર કર્યા હતા.

કોર્ટના દસ્તાવેજો દર્શાવે છે કે કોવિડ-19 મહામારી દરમિયાન પટેલની લેબોરેટરીમાં પોલિમરેઝ ચેઇન રિએક્શન (પીસીઆર) પરીક્ષણો કરવામાં આવતા હતા. માર્ચ 2021ની આસપાસ, લેબોરેટરીએ મેરિડિયન મેડિકલ સ્ટાફિંગ ઇન્ક સાથે કરાર કર્યો. આ કરાર હેઠળ, પ્રયોગશાળાએ મેરિડિયનને પરીક્ષણ નમૂનાઓ એકત્રિત કરવા અને કથિત દર્દીઓ વિશે સંબંધિત જૈવિક માહિતી પૂરી પાડવા માટે લાખો ડોલર ચૂકવ્યા. જોકે, આમાંના ઘણા દર્દીઓ તો અસ્તિત્વમાં નહોતા અથવા મેરિડિયનને ક્યારેય સેમ્પલો પૂરા પાડ્યા ન હતા તેમ ન્યાય વિભાગે જણાવ્યું હતું.

લેબોરેટરીએ કથિત રીતે કાર્યક્રમમાં લગભગ 66.2 મિલિયન ડોલરના ખોટા દાવાઓ રજૂ કર્યા હતા અને લગભગ 44.1 મિલિયન ડોલરની ચુકવણી પ્રાપ્ત કરી હતી. નિવેદનમાં ઉમેર્યું હતું કે પટેલે કથિત યોજનામાંથી વ્યક્તિગત રીતે લગભગ 28 મિલિયન ડોલર મેળવ્યા હતા.

ન્યાય વિભાગના છેતરપિંડી વિભાગના સહાયક એટર્ની જનરલ કોલિન એમ મેકડોનાલ્ડે એક નિવેદનમાં જણાવ્યું હતું કે, આ પ્રતિવાદીએ વ્યક્તિગત લાભ માટે વૈશ્વિક કટોકટીનો કથિત રીતે ઉપયોગ કર્યો હતો, લાખો કોવિડ-19 પરીક્ષણો બનાવ્યા હતા અને પછી કરદાતા પાસેથી બિલિંગ કરાવ્યું હતું.

એફબીઆઈ શિકાગોના સ્પેશિયલ એજન્ટ ઇન ચાર્જ રાયન વ્હેલેને જણાવ્યું હતું કે, નાણાકીય છેતરપિંડી સામે લડવું અને વ્યક્તિગત નફા માટે ગેરકાયદેસર રીતે ફેડરલ સહાય મેળવનારાઓને જવાબદાર ઠેરવવા એફબીઆઈ માટે ટોચની પ્રાથમિકતા છે.

વ્હેલેએ જણાવ્યું હતું કે, મહામારી સહાય કાર્યક્રમો સમાજના નબળા સભ્યોને જીવનરેખા પૂરી પાડવા માટે ડિઝાઇન કરવામાં આવ્યા હતા. જેમને ફેડરલ હેલ્થકેર ડોલર સોંપવામાં આવ્યા છે તેમની જવાબદારી પ્રામાણિકતા અને સચોટ રીતે બિલિંગ કરવાની છે, અને એફબીઆઈ અને અમારા ભાગીદારો ખાતરી કરવા માટે કંઈપણ કરશે કે જેઓ પોતાના હેતુઓ માટે કરદાતાઓના ડોલર છેતરપિંડી કરે છે અને ચોરી કરે છે તેઓને સંપૂર્ણ ન્યાય મળે.

ન્યાય વિભાગે જણાવ્યું હતું કે તેના કાર્યક્રમે 2007થી ફેડરલ હેલ્થકેર કાર્યક્રમો અને ખાનગી વીમા કંપનીઓને $45 બિલિયનથી વધુના કથિત છેતરપિંડી બિલિંગના કેસોમાં 6,200થી વધુ પ્રતિવાદીઓ પર આરોપ મૂક્યો છે. પટેલ પર વાયર છેતરપિંડીના પાંચ ગુનાઓનો આરોપ મૂકવામાં આવ્યો છે. કોર્ટમાં આરોપો સાબિત થયા નથી.