બેંકિંગ ક્ષેત્રના કર્મચારીઓના વિવિધ સંગઠનોએ આગામી ૧૨ ફેબ્રુઆરી, ૨૦૨૬ (ગુરુવાર) ના રોજ રાષ્ટ્રવ્યાપી હડતાલની જાહેરાત કરી છે. નવા લેબર કોડ્સ (શ્રમ કાયદા) અને અન્ય પડતર માંગણીઓના વિરોધમાં આ હડતાલનું આયોજન કરવામાં આવ્યું છે. જોકે, રિઝર્વ બેંક (RBI) દ્વારા સત્તાવાર રજા જાહેર કરવામાં આવી નથી, પરંતુ હડતાલને કારણે બેંકિંગ સેવાઓ ખોરવાઈ શકે તેવી પ્રબળ શક્યતા છે.

હડતાલનું કારણ શું છે?
બેંક કર્મચારીઓના સંગઠનો લાંબા સમયથી કેટલીક માંગણીઓ કરી રહ્યા છે. આ હડતાલ મુખ્યત્વે નીચેના મુદ્દાઓ પર આધારિત છે:

નવા લેબર કોડ્સનો વિરોધ
સરકાર દ્વારા સૂચિત ૪ નવા શ્રમ કાયદાઓનો યુનિયનો વિરોધ કરી રહ્યા છે, જે ૨૯ જૂના શ્રમ કાયદાઓનું સ્થાન લેશે.

૫ દિવસનું કામકાજ
બેંક કર્મચારીઓ લાંબા સમયથી '૫-ડે વર્ક વીક' (શનિ-રવિ રજા) ની માંગ કરી રહ્યા છે.

કર્મચારીઓના અધિકારો
ટ્રેડ યુનિયનોના રજીસ્ટ્રેશન માટેની કડક શરતો અને શ્રમિક વર્ગ પર વધતા હુમલાઓ સામે વિરોધ.

ગ્રાહકો પર શું અસર પડશે?
જોકે બેંકો સત્તાવાર રીતે બંધ નથી, પરંતુ કર્મચારીઓ કામ પર ન આવવાના કારણે શાખાઓમાં કામગીરી અટકી શકે છે. બેંક ઓફ બરોડા (BoB) એ શેરબજાર (BSE) ને સૂચિત કર્યું છે કે હડતાલને કારણે તેમની શાખાઓ અને કચેરીઓના કામકાજમાં વિક્ષેપ પડી શકે છે.

કયા બેંક સંગઠનોએ હડતાળનું એલાન આપ્યું છે?
ઓલ ઈન્ડિયા બેંક એમ્પ્લોઈઝ એસોસિએશન (AIBEA), ઓલ ઈન્ડિયા બેંક ઓફિસર્સ એસોસિએશન (AIBOA), અને બેંક એમ્પ્લોઈઝ ફેડરેશન ઓફ ઈન્ડિયા (BEFI) જેવા મુખ્ય બેંક સંગઠનોએ તેમના સભ્યો અને એકમોને 12 ફેબ્રુઆરી, 2026 ના રોજ 10 કેન્દ્રીય ટ્રેડ યુનિયનો (CTU) સાથે રાષ્ટ્રવ્યાપી સામાન્ય હડતાળમાં જોડાવા હાકલ કરી છે.

બેંક ઓફ બરોડાએ BSE ને કરી આ વાત
BSE ને લખેલા પત્રમાં, બેંક ઓફ બરોડાએ જણાવ્યું હતું કે હડતાળના દિવસે બેંક તેની શાખાઓ અને ઓફિસોનું સુગમ સંચાલન સુનિશ્ચિત કરવા માટે તમામ જરૂરી પગલાં લઈ રહી છે. હડતાળની સ્થિતિમાં, શાખાઓ અને ઓફિસોના કામકાજ પર અસર પડી શકે છે. પત્રમાં વધુમાં જણાવાયું છે કે બેંકને AIBEA, AIBOA અને BEFI દ્વારા બોલાવવામાં આવેલી હડતાળની સૂચના મળી છે. સૂચનામાં વધુમાં જણાવાયું છે કે AIBEA, AIBOA અને BEFI એ વિવિધ મુદ્દાઓ/માગણીઓ પર ગુરુવાર, 12 ફેબ્રુઆરી, 2026 ના રોજ હડતાળ પર જવાના તેમના નિર્ણયની જાણ કરતી નોટિસ જારી કરી છે.