ચિલી હાલ ભયંકર આગની ઝપેટમાં છે. અધિકારીઓએ જણાવ્યું હતું કે મધ્ય અને દક્ષિણ ચિલીમાં જંગલોમાં લાગેલી આગને કારણે ઓછામાં ઓછા 18 લોકોના મોત થયા છે. હજારો એકર જંગલ બળીને ખાક થઈ ગયું છે અને સેંકડો ઘરો નાશ પામ્યા છે. ચિલીમાં હવામાનની વાત કરીએ તો આ દક્ષિણ અમેરિકન દેશ હાલમાં તીવ્ર ગરમીના મોજાની ઝપેટમાં છે. ચિલીના રાષ્ટ્રપતિ ગેબ્રિયલ બોરિકે મધ્ય બાયોબાયો ક્ષેત્ર અને દેશના પડોશી ન્યુબલ ક્ષેત્રની પરિસ્થિતિને ધ્યાનમાં રાખીને કટોકટીની સ્થિતિ જાહેર કરી છે.

ચિલીના જંગલોમાં આગ સતત વધી રહી છે અને હવે તે 8,500 હેક્ટર (21,000 એકર) સુધી ફેલાઈ ગઈ છે. બાયોબિઓ પ્રદેશના સૌથી વધુ અસરગ્રસ્ત શહેર કોન્સેપ્સિઓનમાં એક પ્રેસ કોન્ફરન્સ દરમિયાન, રાષ્ટ્રપતિ બોરિકે પીડિતો પ્રત્યે સંવેદના વ્યક્ત કરી હતી. તેમણે કહ્યું કે પ્રારંભિક સરકારી અહેવાલો દર્શાવે છે કે 18 લોકો મૃત્યુ પામ્યા છે અને 300 ઘરો નાશ પામ્યા છે, અને નુકસાનનો સંપૂર્ણ અંદાજ હજુ નક્કી કરવાનો બાકી છે.

રાષ્ટ્રપતિ બોરિકે અંદાજ લગાવ્યો હતો કે ફક્ત બાયોબિઓ પ્રદેશમાં જ અસરગ્રસ્ત ઘરોની કુલ સંખ્યા એક હજારને વટાવી ગઈ છે. પર્વતોમાં લાગેલી આગને કારણે 50,000 લોકોને તેમના ઘર છોડવાની ફરજ પડી છે. તેમણે કહ્યું કે આ મુશ્કેલ સમય છે. તેમના સંબોધન પછી સ્થાનિક અધિકારીઓની ફરિયાદો આવી જેમણે કહ્યું કે કલાકો સુધી બધે વિનાશ હતો અને કોઈ મદદ મળી ન હતી.

ચિલીમાં પરિસ્થિતિ એવી છે કે ફાયરબ્રિગેડ દળો આગ ઓલવવા માટે સંઘર્ષ કરી રહ્યા છે. ગરમી અને ભારે પવનને કારણે પરિસ્થિતિ વધુ વણસી છે. ગૃહમંત્રી અલ્વારો એલિઝાલ્ડે જણાવ્યું હતું કે આગામી દિવસોમાં હવામાનની સ્થિતિ સારી નથી અને ખૂબ ઊંચા તાપમાનનો સંકેત છે. ઘણા લોકોએ કહ્યું કે આગ લાગ્યા પછી તેઓ તેમના ઘરોમાં ફસાયા છે. 55 વર્ષીય જોન ગુઝમેને કહ્યું, ઘણા લોકોએ સ્થળ ખાલી કર્યું ન હતું. તેઓ તેમના ઘરોમાં રહ્યા કારણ કે તેમને લાગ્યું કે જંગલની ધાર પર આગ બંધ થઈ જશે.

પેન્કો શહેરનો મોટો ભાગ આગમાં લપેટાઈ ગયો છે. કાર, શાળાઓ અને ચર્ચ બળી ગયા છે. હજારો લોકોને કામચલાઉ આશ્રયસ્થાનોમાં આશરો લેવાની ફરજ પડી છે. 52 વર્ષીય જુઆન લાગોસે કહ્યું કે તે પોતાના બાળકો સાથે અંધારામાં ભાગ્યો હતો. ખેતરો, ઘરો, રસ્તાઓ અને કારમાં મૃતદેહો મળી રહ્યા છે. 54 વર્ષીય વિક્ટર બુર્બોઆએ કહ્યું, આપણે જે જોઈ શકીએ છીએ તે મુજબ, કેટલાક લોકો મૃત્યુ પામ્યા છે.​​​​​​​

ચીલીમાં દર ઉનાળે જંગલમાં આગ લાગે છે

મધ્ય અને દક્ષિણ ચિલીમાં દર ઉનાળામાં જંગલમાં આગ લાગે છે, જે સામાન્ય રીતે ફેબ્રુઆરીમાં ચરમસીમાએ પહોંચે છે. 2024માં, ચિલીના મધ્ય દરિયાકાંઠે ભીષણ આગમાં ઓછામાં ઓછા 130 લોકો માર્યા ગયા, જે 2010ના વિનાશક ભૂકંપ પછી દેશની સૌથી ભયંકર કુદરતી આફત બની હતી. પડોશી દેશ આર્જેન્ટિના પણ છેલ્લા કેટલાક અઠવાડિયાથી જંગલની આગને કાબુમાં લેવા માટે સંઘર્ષ કરી રહ્યું છે, જ્યાં આગ હજારો એકર બળીને ખાક થઈ ગઈ છે.