ક્રિકેટ રસિકો માટે રવિવાર એટલે આખા વર્ષનો સૌથી મોટો ઉત્સવ, કારણ કે કાલે આઈપીએલ (IPL) નો મહામુકાબલો ખેલાવાનો છે. દુનિયાના સૌથી મોટા સ્ટેડિયમમાં જ્યારે બે સર્વશ્રેષ્ઠ ટીમો ટ્રોફી જીતવા આમને-સામને હશે, ત્યારે લાખો આંખો મેદાન પર ટકેલી હશે. પરંતુ, આ કરોડો રૂપિયાના રોમાંચ વચ્ચે હવે કુદરત વિલન બને તેવી આશંકા સેવાઈ રહી છે, જેને કારણે ધબકારા વધી ગયા છે.

અમદાવાદના મોટેરા સ્થિત નરેન્દ્ર મોદી સ્ટેડિયમમાં આવતીકાલે રવિવારે રમાનારી આઈપીએલ (IPL ૨૦૨૬) ની ભવ્ય ફાઇનલ મેચ પર વરસાદનું મોટું જોખમ તોળાઈ રહ્યું છે. હવામાન વિભાગ દ્વારા જાહેર કરાયેલી તાજી આગાહી મુજબ રાજ્યમાં આજથી આગામી ૬ દિવસ સુધી ચોમાસા જેવો માહોલ રહેવાનો છે, જેની સીધી અસર આવતીકાલની હાઈ-વોલ્ટેજ મેચ પર પડી શકે છે.

અમદાવાદમાં કેમ વધી ચિંતા?
હવામાન વિભાગના જણાવ્યા અનુસાર, વાતાવરણમાં 'થન્ડરસ્ટોર્મ એક્ટિવિટી' (વાવાઝોડાની સિસ્ટમ) સક્રિય થઈ છે. આ સિસ્ટમના કારણે રવિવારે અમદાવાદ અને તેની આસપાસના વિસ્તારોમાં પવનના સુસવાટા સાથે હળવોથી મધ્યમ વરસાદ પડવાની પૂરેપૂરી સંભાવના છે. જો મેચ દરમિયાન અથવા ટોસના સમયે વરસાદ ત્રાટકે, તો ઓવરોની સંખ્યા ઓછી થઈ શકે છે અથવા ચાહકોને લાંબી રાહ જોવી પડી શકે છે.

​​​​​​​સ્ટેડિયમની તૈયારીઓ અને નિયમો
આ અચાનક આવેલા હવામાનના પલટાને કારણે ગુજરાત ક્રિકેટ એસોસિએશન (GCA) ના અધિકારીઓ પણ એલર્ટ થઈ ગયા છે. સ્ટેડિયમને સુકવવા માટે આધુનિક ડ્રેનેજ સિસ્ટમ અને પિચને ઢાંકવા માટેના કવર્સ તૈયાર રાખવામાં આવ્યા છે. જો રવિવારે વરસાદને કારણે રમત શક્ય નહીં બને, તો આઈપીએલના નિયમો મુજબ 'રિઝર્વ ડે' (Reserve Day) અથવા સુપર ઓવરનો આશરો લેવામાં આવી શકે છે.