પોખરા આંતરરાષ્ટ્રીય એરપોર્ટ પ્રોજેક્ટમાં અબજો રૂપિયાના ઉચાપતનાં આરોપમાં અન્ય 55 વ્યક્તિ પણ સામેલ, તમામ સામે કેસ કરાયો,ચાર્જશીટમાં નેપાળના નાગરિક ઉડ્ડયન સત્તામંડળના ૧૦ ભૂતપૂર્વ સચિવો અને વરિષ્ઠ અધિકારીઓના નામનો પણ ઉલેખ

નેપાળના ભ્રષ્ટાચાર વિરોધી  સંસ્થાએ ચીન દ્વારા ભંડોળ પૂરું પાડવામાં આવેલા પોખરા આંતરરાષ્ટ્રીય એરપોર્ટ પ્રોજેક્ટમાં અબજો રૂપિયાના ઉચાપતનો આરોપ લગાવી પાંચ ભૂતપૂર્વ મંત્રીઓ સહિત ૫૫ વ્યક્તિઓ સામે ખાસ કોર્ટમાં ભ્રષ્ટાચારનો કેસ દાખલ કરતા ખળભળાટ મચી ગયો છે.મધ્ય નેપાળમાં સ્થિત, આ એરપોર્ટને પ્રખ્યાત અન્નપૂર્ણા સર્કિટનું પ્રવેશદ્વાર માનવામાં આવે છે, જે એક લોકપ્રિય ટ્રેકિંગ સ્થળ છે. પાંચ ભૂતપૂર્વ મંત્રીઓ ઉપરાંત, ચાર્જશીટમાં નેપાળના નાગરિક ઉડ્ડયન સત્તામંડળના ૧૦ ભૂતપૂર્વ સચિવો અને વરિષ્ઠ અધિકારીઓના નામ પણ છે.

૮ અબજ નેપાળી રૂપિયાના ગેરઉપયોગના આરોપ

કમિશન ફોર ઇન્વેસ્ટિગેશન ઓફ એબ્યુઝ ઓફ ​​ઓથોરિટીના સહ-પ્રવક્તા ગણેશ બહાદુર અધિકારીએ જણાવ્યું હતું કે ચાર્જશીટમાં આરોપ મૂકવામાં આવ્યો છે કે આ ૫૫ લોકો પર પોખરા એરપોર્ટ પ્રોજેક્ટમાં કુલ ૮.૩૬ અબજ નેપાળી રૂપિયાનો ગેરઉપયોગ કરવાનો આરોપ છે, જે ચીન પાસેથી ઓછા વ્યાજની લોનનો ઉપયોગ કરીને બનાવવામાં આવી રહ્યો છે.

ભૂતપૂર્વ મંત્રીઓ રામ શરણ મહત, ભીમ પ્રસાદ આચાર્ય, સ્વર્ગસ્થ પોસ્ટ બહાદુર બોગાટી, રામ કુમાર શ્રેષ્ઠ અને દીપક ચંદ્ર અમાત્ય સામે કેસ દાખલ કરવામાં આવ્યો છે. ૫૫ આરોપીઓમાં નાગરિક ઉડ્ડયન સત્તામંડળ ના ભૂતપૂર્વ ડિરેક્ટર જનરલ, ત્રિ રત્ના મહાજન અને રતીશ ચંદ્ર લાલ સુમન અને વર્તમાન ડિરેક્ટર જનરલ પ્રદીપ અધિકારીનો સમાવેશ થાય છે.

ચીની કોન્ટ્રાક્ટર અને તેમના નેપાળી પ્રતિનિધિઓ સામે પણ કોર્ટ કેસ

પ્રોજેક્ટમાં સામેલ ચીની કોન્ટ્રાક્ટર અને તેમના નેપાળી પ્રતિનિધિઓ સામે પણ કોર્ટ કેસ દાખલ કરવામાં આવ્યો છે. એરપોર્ટ ચાઇના સીએએમસી એન્જિનિયરિંગ કંપની લિમિટેડ દ્વારા બનાવવામાં આવ્યું હતું. કાઠમંડુ પોસ્ટ અનુસાર, પોખરા આંતરરાષ્ટ્રીય એરપોર્ટ જાન્યુઆરી 2023 માં કાર્યરત થયું હતું પરંતુ હજુ સુધી તેને કોઈ નિયમિત આંતરરાષ્ટ્રીય મુસાફરોની ફ્લાઇટ મળી નથી.