દિવાળી વેકેશનની મજા માણવા માટે કર્ણાટકના પ્રવાસે ગયેલો સુરતનો એક હસતો-રમતો પરિવાર વેરવિખેર થઈ ગયો છે. કર્ણાટકના કોડાગુ જિલ્લાના કુશલનગર નજીક આવેલા પ્રખ્યાત હરંગી બેકવોટર્સમાં બોટિંગ કરી રહેલા સુરતના એક દંપતીનું બોટ પલટી જતાં ઊંડા પાણીમાં ડૂબી જવાથી કરૂણ મોત નીપજ્યું છે. જોકે, આ ગોઝારી દુર્ઘટના વચ્ચે તેમની સાથે રહેલા બંને માસૂમ સંતાનોનો આબાદ બચાવ થયો છે. એક જ પળમાં માતા-પિતાની છત્રછાયા ગુમાવી દેનાર બાળકો પર આભ ફાટી પડ્યું છે. 

પ્રાપ્ત માહિતી અનુસાર, હાલ સુરતમાં રહેતા ૫૦ વર્ષીય ધર્મેશભાઈ અને તેમના ૪૮ વર્ષીય પત્ની નિમ્મીબેન પોતાના બે સંતાનો સાથે રજાઓ ગાળવા માટે કર્ણાટકના કોડાગુ ખાતે ફરવા ગયા હતા. પ્રવાસના આનંદ દરમિયાન આખો પરિવાર કુશલનગર નજીક આવેલા હરંગી બેકવોટર્સ ખાતે પહોંચ્યો હતો, જ્યાં 'એડવેન્ચર વોટર સ્પોર્ટ્સ' દ્વારા સંચાલિત બોટમાં સવાર થઈને પરિવાર બોટિંગની મજા માણી રહ્યો હતો. આ દરમિયાન આનંદનો માહોલ અચાનક માતમમાં ફેરવાઈ ગયો, જ્યારે બોટ એક ફૂલ સ્પીડમાં વળાંક લઈ રહી હતી ત્યારે ચાલકે અચાનક સ્ટિયરિંગ પરથી કાબૂ ગુમાવી દીધો હતો, જેના કારણે બેકાબૂ બનેલી બોટ પાણીમાં પલટી ખાઈ ગઈ હતી. બોટ પલટતાની સાથે જ પરિવારના ચારેય સભ્યો ઊંડા પાણીમાં ફંગોળાઈને ખાબક્યા હતા.

આ ભયાનક દુર્ઘટનામાં બોટિંગ કરતી વખતે નિયમ મુજબ પરિવારના ચારેય સભ્યોએ સુરક્ષાના ભાગરૂપે લાઈફ જેકેટ પહેરેલા જ હતા. બોટ પલટી જવાની ઘટના બનતા જ આસપાસના વિસ્તારમાં હાજર સ્થાનિક લોકો અને વોટર સ્પોર્ટ્સનો બચાવ સ્ટાફ તત્કાલિક મદદ માટે દોડી આવ્યો હતો. પાણીમાં તરતા બંને બાળકોને તાત્કાલિક બહાર કાઢીને સુરક્ષિત રીતે કિનારે પહોંચાડી દેવામાં આવ્યા હતા. પરંતુ, કમનસીબે ધર્મેશભાઈ અને નિમ્મીબેન પલટી ગયેલી બોટની બરાબર નીચે જ ફસાઈ ગયા હતા. લાઈફ જેકેટ પહેરેલું હોવા છતાં બોટના ભારે વજન અને પાણીની અંદર ફસાઈ જવાના કારણે તેઓ સમયસર સપાટી પર આવી શક્યા ન હતા, જેના કારણે પાણીમાં શ્વાસ રૂંધાવાથી બંનેનું ઘટનાસ્થળે જ કમકમાટીભર્યું મોત નીપજ્યું હતું.

પોતાની નજર સમક્ષ જ માતા-પિતાને ડૂબી જતા જોનાર બંને માસૂમ સંતાનો આઘાત અને ડરના માર્યા ધ્રૂજી ઉઠ્યા હતા. આ દુર્ઘટનાની જાણ થતા જ સ્થાનિક પોલીસ અને ફાયર વિભાગની ટીમ તાત્કાલિક ઘટનાસ્થળે દોડી આવી હતી. ફાયર બ્રિગેડના જવાનોએ સ્થાનિક તરવૈયાઓની મદદથી સંયુક્ત રીતે સઘન રેસ્ક્યુ ઓપરેશન હાથ ધર્યું હતું અને ભારે જહેમત બાદ પાણીમાંથી દંપતીના મૃતદેહોને બહાર કાઢવામાં આવ્યા હતા.

ત્યારબાદ બંને મૃતદેહોને પોસ્ટમોર્ટમ અર્થે કુશલનગર કોમ્યુનિટી હેલ્થ સેન્ટરના મોર્ચરી રૂમમાં ખસેડવામાં આવ્યા હતા. આ સમગ્ર દુર્ઘટના કુશલનગર ગ્રામ્ય પોલીસ સ્ટેશનની હદમાં બની હોવાથી પોલીસે કાયદેસરની કાર્યવાહી હાથ ધરી છે. પોલીસે અકસ્માતે મોતનો ગુનો નોંધીને બોટ સંચાલકોની ગફલત, ઓવરસ્પિડિંગ કે અન્ય બેદરકારી છે કે કેમ તે દિશામાં ઊંડાણપૂર્વક તપાસ શરૂ કરી છે. વેકેશન માણવા ગયેલા પરિવાર પર આવેલા આ અચાનક આફતના સમાચાર મળતા સુરત રહેતા તેમના સ્વજનો અને વતનમાં પણ ગમગીની છવાઈ ગઈ છે.