તાજેતરમાં રાજકોટ મહાનગરપાલિકાની ટાઉન પ્લાનીંગ શાખા દ્વારા સેન્ટ્રલ ઝોન કચેરી હેઠળના સિંધી કોલોની અને રેલનગર વિસ્તારમાં ગેરકાયદેસર બાંધકામ ઉપર બુલડોઝર ફેરવી અંદાજે કુલ ૧૧૦૦ ચોરસ મીટર જમીન ખુલી કરવામાં આવી હતી.

વિશેષમાં રાજકોટ મહાપાલિકાના સેન્ટ્રલ ઝોનના સિટી એન્જીનિયર એ.એ.રાવલએ વિગતો જાહેર કરતા જણાવ્યું હતું કે, ડેપ્યુટી મ્યુનિસિપલ કમિશનર હર્ષદ આર.પટેલની સુચના અનુસાર તથા સીટી એન્જીનિયરના માર્ગદર્શન હેઠળ રાજકોટ મહાનગરપાલિકાની ટાઉન પ્લાનીંગ શાખા દ્વારા ગઇકાલે મહાપાલિકાના સેન્ટ્રલ ઝોન વિસ્તાર પૈકી વોર્ડ નં.૩માં (૧) રેલનગર વિસ્તારમા રૂદ્ર રેસીડેન્સીની સામે (૨) જંક્શન પ્લોટ વિસ્તારમાં સિંધી કોલોની રહેણાંકમાં ગેરકાયદેસર બાંધકામ દુર કરી અંદાજે કુલ ૧૧૦૦ ચોરસ મીટર જમીન ખુલી કરાવવામાં આવી હતી. તેમણે ઉમેર્યું હતું કે નોન ટીપી એરિયાની જમીન દબાણ મુક્ત કરાઇ હતી. આ કામગીરીમાં ટાઉન પ્લાનીંગ શાખાના સેન્ટ્રલ ઝોનનો તમામ સ્ટાફ સ્થળ ઉપર હાજર રહ્યો હતો તથા આ કામગીરી દરમ્યાન સ્થાનિકે કાયદો અને વ્યવસ્થા જળવાય રહે તે માટે પ્રધુમન નગર પોલીસ સ્ટેશનનો સ્ટાફ પણ સ્થળ પર હાજર રહ્યો હતો.

અત્રે ઉલ્લેખનીય છે કે ગુનેગારો સામે ચાલી રહેલી ડ્રાઇવ અંતર્ગત રાજકોટ મહાનગરપાલિકા અને રાજકોટ શહેર પોલીસ દ્વારા સંયુક્ત ઉપક્રમે આ ઓપરેશન હાથ ધરાયુ હતું.