#teamaajkaal

રાજકોટના કાલાવડ રોડ પર આવેલા બી.એ.પી.એસ. સ્વામિનારાયણ મંદિર ખાતે પ્રકાશના પર્વ દીપાવલીની ઉત્સાહભેર અને ભક્તિમય વાતાવરણમાં ઉજવણી કરવામાં આવી હતી. આ પવિત્ર અવસરે મંદિરમાં યોજાયેલા ભવ્ય દીપોત્સવ પર્વમાં હજારોની સંખ્યામાં હરિભક્તો ઉમટી પડ્યા હતા. સમગ્ર મંદિર પરિસર દીવડાઓના દિવ્ય પ્રકાશથી ઝગમગી ઉઠ્યું હતું અને હરિભક્તોએ પોતાના આરાધ્યદેવના દર્શન કરી ધન્યતા અનુભવી હતી.

દીપોત્સવ દરમિયાન મંદિરના સભાખંડ અને ગર્ભકુલમાં વિશેષ શણગાર કરવામાં આવ્યો હતો. ભગવાન સ્વામિનારાયણની મૂર્તિ સમક્ષ હજારો દીવડાઓની અદ્ભુત આરાધના કરવામાં આવી હતી. દીપકના પ્રકાશમાં ભગવાન સ્વામિનારાયણની મૂર્તિ પર એક અદભુત અને દિવ્ય તેજ જોવા મળ્યું હતું. પ્રભુના આ અલૌકિક અને તેજોમય સ્વરૂપના દર્શન કરીને ઉપસ્થિત સૌ કોઈ ભાવવિભોર બની ગયા હતા અને વાતાવરણ ‘જય સ્વામિનારાયણ’ના નાદથી ગુંજી ઉઠ્યું હતું.

આ દિવ્ય પર્વ નિમિત્તે મંદિરમાં વિશેષ મહાઆરતીનું પણ આયોજન કરવામાં આવ્યું હતું. સંતો અને હરિભક્તોએ એકસાથે દીવડા પ્રગટાવી વિશ્વશાંતિ તેમજ સૌના કલ્યાણ માટે પ્રાર્થના કરી હતી. દર વર્ષે યોજાતો આ દીપોત્સવ રાજકોટવાસીઓ માટે શ્રદ્ધા અને ભક્તિનું મોટું કેન્દ્ર બની રહે છે. ભક્તિસભર આયોજન અને દિવ્ય વાતાવરણ વચ્ચે હરિભક્તોએ ઉત્સવનો આનંદ માણ્યો હતો.