એન્ફોર્સમેન્ટ ડિરેક્ટોરેટ (ઈડી)એ જનતાને નકલી સમન્સ સામે સતર્ક રહેવાની સલાહ આપી છે. ઈડી અધિકારીઓના જણાવ્યા અનુસાર, તાજેતરના સમયમાં,ઈડીના નામે નકલી સમન્સ અને નોટિસ મોકલીને લોકો સાથે છેતરપિંડી અથવા પૈસા પડાવવાના પ્રયાસો થયા છે. આ નકલી સમન્સ અસલી સમન્સ જેવા લાગે છે, જેના કારણે જનતા માટે અસલી અને નકલી વચ્ચે ભેદ પાડવો મુશ્કેલ બને છે.

ઈડી અધિકારીઓએ જણાવ્યું હતું કે બધા અસલી સમન્સ હવે એક સિસ્ટમ દ્વારા જારી કરવામાં આવે છે, જેમાં ક્યુઆર કોડ અને એક અનન્ય પાસકોડનો સમાવેશ થાય છે. આનાથી કોઈપણ વ્યક્તિ સરળતાથી ચકાસી શકે છે કે તેમને મળેલ સમન્સ અસલી છે કે નકલી. સમન્સમાં જારી કરનાર અધિકારીની સહી, સીલ, સત્તાવાર ઇમેઇલ આઈટી અને ફોન નંબર પણ હશે.

સમન્સ વાસ્તવિક છે કે નકલી તે કેવી રીતે તપાસવું

સમન્સ ચકાસવાની બે રીતો છે. પ્રથમ, અસલી અને નકલી સમન્સ વચ્ચે તફાવત કરવા માટે ક્યુઆર કોડ સ્કેન કરવાનો છે. આ પદ્ધતિ માટે કેટલીક બાબતો ધ્યાનમાં રાખવાની જરૂર છે.

સમન્સ પર છાપેલ ક્યુઆર કોડને તમારા મોબાઇલ ફોનથી સ્કેન કરો.

સ્કેન કરવાથી ED વેબસાઇટ પર એક પૃષ્ઠ ખુલશે.

તે પેજ પર સમન્સ પર પાસકોડ દાખલ કરો.

જો માહિતી સાચી હશે, તો વેબસાઇટ સમન્સ સંબંધિત બધી વિગતો (જેમ કે નામ, અધિકારીનું નામ, હોદ્દો અને તારીખ) પ્રદર્શિત કરશે.

બીજી રીત એ છે કે ઈડીની સત્તાવાર વેબસાઇટની મુલાકાત લઈને સમન્સ તપાસો. આ પદ્ધતિ પણ સરળ છે, અને તમે થોડા પગલાં અનુસરીને સમન્સ ચકાસી શકો છો.

ઈડી વેબસાઇટ https://enforcementdirectorate.gov.in પર જાઓ.

ત્યાં 'વેરિફાય યોર સમન્સ' વિકલ્પ પર ક્લિક કરો.

સમન્સ નંબર અને પાસકોડ દાખલ કરો.

જો માહિતી સાચી હશે, તો મૂળ સમન્સની વિગતો વેબસાઇટ પર દેખાશે.

ઈડીએ જણાવ્યું હતું કે સમન્સ જારી થયાના 24 કલાક પછી આ ચકાસણી કરી શકાય છે (રજાઓ અને શનિવાર અને રવિવાર સિવાય).

જો સમન્સ સિસ્ટમ દ્વારા જારી ન કરવામાં આવે તો શું કરવું?

ધારો કે તમને આપવામાં આવેલ સમન્સ સિસ્ટમ દ્વારા જારી કરવામાં આવ્યું ન હોય, તો તમે તેને ચકાસવા માટે નીચે સૂચિબદ્ધ ઈડી અધિકારીનો સંપર્ક કરી શકો છો.

નામ: રાહુલ વર્મા

પદ: સહાયક નિયામક

સરનામું: એન્ફોર્સમેન્ટ ડિરેક્ટોરેટ, એ-બ્લોક, એન્ફોર્સમેન્ટ ભવન, એપીજે અબ્દુલ કલામ રોડ, નવી દિલ્હી - 110011

ઈમેલ: adinv2-ed@gov.in

ફોન: 011-23339172

ડિજિટલ ધરપકડ સંપૂર્ણપણે નકલી

ઈડીએ પણ સ્પષ્ટતા કરી છે કે કેટલાક છેતરપિંડી કરનારાઓ "ડિજિટલ ધરપકડ" અથવા "ઓનલાઈન ધરપકડ" ના બહાને લોકોને ધમકી આપીને પૈસા પડાવી રહ્યા છે. ઈડીએ જણાવ્યું હતું કે, "આવો કોઈ કાયદો નથી. ઈડી દ્વારા કરવામાં આવતી ધરપકડ હંમેશા કાનૂની પ્રક્રિયાને અનુસરીને રૂબરૂ કરવામાં આવે છે, ઓનલાઈન કે ડિજિટલ રીતે નહીં."

ઈડીએ જનતાને અપીલ કરી છે કે ઈડી અધિકારી હોવાનો દાવો કરતી અને પૈસા માંગતી અથવા ધરપકડની ધમકી આપતી કોઈપણ વ્યક્તિ અથવા સંદેશ પર વિશ્વાસ ન કરે.