દક્ષિણ અને મધ્ય ગુજરાતના કેટલાક ભાગોમાં આજે બપોર બાદ 4.35 વાગ્યે ભૂકંપના આંચકા અનુભવાતા લોકોમાં ફફડાટ ફેલાયો છે. રિક્ટર સ્કેલ પર આ ભૂકંપની તીવ્રતા 3.4 નોંધવામાં આવી છે. ભૂકંપ વિજ્ઞાન કેન્દ્ર (આઇએસઆર)ના રિપોર્ટ અનુસાર, આ ભૂકંપનું એપી સેન્ટર (કેન્દ્રબિંદુ) આણંદથી 36 કિલોમીટર દૂર નોંધાયું છે.

ભૂકંપના આંચકા અનુભવાતા જ રહેણાંક વિસ્તારોમાં લોકો ગભરાઈને ઘરની બહાર દોડી આવ્યા હતા. ખાસ કરીને બહુમાળી ઇમારતોમાં રહેતા લોકોમાં વધુ ભય જોવા મળ્યો હતો. સ્થાનિક વહીવટી તંત્રના જણાવ્યા અનુસાર, આ ભૂકંપની તીવ્રતા ઓછી હોવાને કારણે અત્યાર સુધી કોઈ પણ પ્રકારના જાન-માલના નુકસાન કે મિલકતને નુકસાન થવાના સમાચાર પ્રાપ્ત થયા નથી.

નિષ્ણાતોના મતે, જમીનની અંદર પ્લેટોમાં થતી હલચલને કારણે આ પ્રકારના નાના આંચકા આવતા હોય છે. જોકે, સાવચેતીના ભાગરૂપે તંત્ર દ્વારા લોકોને ગભરાવાની જરૂર નથી તેવી અપીલ કરવામાં આવી છે. દક્ષિણ ગુજરાતના દરિયાકાંઠાના વિસ્તારોમાં ભૂસ્તરીય હલચલને પગલે ભૂકંપના આવા હળવા આંચકા સમયાંતરે નોંધાતા રહે છે, જે સુરક્ષાની દ્રષ્ટિએ ચિંતાનો વિષય બન્યો છે.