કુવાડવા નજીક વાદીપરામાં રહેતાં મુન્નાનાથ રાણીનાથ મેર (ઉ.વ.૨૦) તથા તેના પિતા રાણીનાથ રૂપનાથ મેર (ઉ.વ.૭૦) પર ગામમાં જ રહેતાં જાગુનાથ, દેવનાથ સહિતનાએ હુમલો કરી ઢીકાપાટુનો મારમારી, તલવાર વડે હુમલો કરતા બંનેને સારવાર માટે રાજકોટ સિવિલ હોસ્પિટલમાં ખસેડાતાં હોસ્પિટલ ચોકીના સ્ટાફે એરપોર્ટ પોલીસને જાણ કરી હતી.

મુન્નાનાથે કહ્યું હતું કે તે ઘરેથી મોટરસાઇકલ હંકારીને બહાર જતો હતો ત્યારે દૈવનાથના ઘર પાસેથી જ રસ્તો નીકળતો હોઈ ત્યાંથી પસાર થતાં તેના સહિતનાએ તેને આંતરી અહિથી તું શું કામ નીકળે છે? કહી ગાળો દઇ ધમકાવી તલવારથી હુમલો કર્યો હતો. આ ઝઘડાની જાણ થતાં તેના પિતા રાણીનાથ બચાવવા વચ્ચે પડતાં તેને પણ તલવાર ઝીંકી દેવાઈ હતી. બંનેને લોહીલુહાણ હાલતમાં રાજકોટ ખસેડાયા હતાં. મુન્નાનાથે આક્ષેપ કર્યો હતો કે એક છોકરી સાથે તેને અગાઉ પ્રેમ હતો તેના કારણે પણ દેવનાથ સાથે મનદુઃખ હતું. બનાવ અંગે એરપોર્ટ પોલીસે વધુ તપાસ હાથ ધરી છે.