ખોડલધામથી મોટા સમાચાર સામે આવ્યા છે. ખોડલધામ સંગઠનના અધ્યક્ષ તરીકે પૂર્વ મુખ્યપ્રધાન આનંદીબેન પટેલના પુત્રી અનાર પટેલના નામની સત્તાવાર જાહેરાત કરવામાં આવી છે. ખોડલધામ ટ્રસ્ટના ચેરમેન નરેશ પટેલે ખોડલધામ ખાતે યોજાયેલી કન્વીનર મીટ 2026 દરમિયાન આ મહત્વની જાહેરાત કરી હતી.

હવે ખોડલધામ સંગઠનનો સમગ્ર કાર્યભાર અનાર પટેલ સંભાળશે

નરેશ પટેલે જણાવ્યું હતું કે, હવે ખોડલધામ સંગઠનનું સમગ્ર કાર્યભાર અનાર પટેલ સંભાળશે. સંગઠનની પ્રવૃત્તિઓને વધુ સુવ્યવસ્થિત અને અસરકારક બનાવવા માટે આ નિર્ણય લેવામાં આવ્યો છે. અનાર પટેલના નેતૃત્વ હેઠળ ખોડલધામ સંગઠન સમાજસેવા, શિક્ષણ, સંસ્કૃતિ અને વિકાસલક્ષી કાર્યોમાં વધુ સક્રિય ભૂમિકા ભજવશે તેવી આશા વ્યક્ત કરવામાં આવી છે.

સંગઠનને નવી દિશા અને નવી ઊર્જા મળશે

કન્વીનર મીટમાં ઉપસ્થિત ટ્રસ્ટના સભ્યો, આગેવાનો અને સમાજના પ્રતિનિધિઓએ આ નિર્ણયને આવકાર્યો હતો. ખોડલધામ એક આસ્થા અને એકતા માટેનું મહત્વપૂર્ણ કેન્દ્ર છે અને નવા અધ્યક્ષ તરીકે અનાર પટેલની નિમણૂકથી સંગઠનને નવી દિશા અને નવી ઊર્જા મળશે એવું માનવામાં આવી રહ્યું છે.​​​​​​​

2026ની આ જાહેરાતને મહત્વપૂર્ણ ગણવામાં આવી રહી છે

ખોડલધામ સંગઠન માટે વર્ષ 2026ની આ જાહેરાતને મહત્વપૂર્ણ ગણવામાં આવી રહી છે, કારણ કે આવનારા સમયમાં સંગઠનની કામગીરી અને આયોજનમાં મોટા ફેરફારો અને નવી પહેલ જોવા મળશે. 

નરેશ પટેલે અનાર પટેલના નામની ઘોષણા કરતા જણાવ્યું હતું કે, સંગઠનને વધુ મજબૂત કરવા અને યુવા તેમજ મહિલા શક્તિને જોડવા માટે આ નિર્ણય લેવાયો છે. અત્યાર સુધી પડદા પાછળ રહીને સેવાકીય પ્રવૃત્તિઓ સાથે જોડાયેલા અનાર પટેલ હવે સીધી રીતે ખોડલધામના સંગઠન માળખાનું નેતૃત્વ કરશે. કન્વીનર મીટમાં હાજર રહેલા સમાજના અગ્રણીઓ અને સ્વયંસેવકોએ આ નિર્ણયને વધાવ્યો હતો. આગામી સમયમાં ખોડલધામ દ્વારા યોજાનારા વિવિધ સામાજિક અને સંગઠનલક્ષી કાર્યક્રમોમાં અનાર પટેલની ભૂમિકા નિર્ણાયક સાબિત થશે.