સુરતમાં વરસેલા ભારે વરસાદના કારણે ઠેર-ઠેર જળબંબાકારની સ્થિતિ સર્જાઈ છે, જેનાથી સામાન્ય જનજીવન અસ્તવ્યસ્ત થઈ ગયું છે. આ પરિસ્થિતિ વચ્ચે શહેરના ભાટેના વિસ્તારમાંથી એક અત્યંત કરુણ અને ચિંતાજનક દ્રશ્યો સામે આવ્યા છે. રસ્તાઓ પર ઘૂંટણસમા પાણી ભરાઈ જવાના કારણે સ્થાનિક રહીશોને પોતાના સ્વજનની અંતિમયાત્રા પણ પાણીમાંથી કાઢવા માટે મજબૂર બનવું પડ્યું હતું.

શોકના સમયે પણ હાલાકી ભોગવવાનો વારો

ભાટેના વિસ્તારમાં ચારેય તરફ પાણી ભરાઈ જવાથી મુખ્ય રસ્તાઓ અને શેરીઓ જળમગ્ન થઈ ગઈ છે. પરિવારમાં સ્વજનના અવસાનથી છવાયેલા ઘેરા શોકના માહોલ વચ્ચે પણ નવજીવન અને સ્મશાન સુધી પહોંચવા માટે લોકોને ભારે મુશ્કેલીઓનો સામનો કરવો પડ્યો હતો. અંતિમયાત્રામાં જોડાયેલા લોકો ઘૂંટણસમા પાણીમાં ચાલીને ઠાઠડી લઈ જતા નજરે પડ્યા હતા, જે દ્રશ્યોએ ઉપસ્થિત સૌ કોઈના કાળજા કંપાવી દીધા હતા.

પાલિકા તંત્ર સામે સ્થાનિકોમાં ભારે રોષ

દર વર્ષે ચોમાસામાં ભાટેના સહિતના નીચાણવાળા વિસ્તારોમાં પ્રી-મોન્સૂન કામગીરીના દાવાઓ છતાં આવી જ વિકટ સ્થિતિ સર્જાતી હોવાનો સ્થાનિકોએ આક્ષેપ કર્યો છે. અંતિમક્રિયા જેવા અત્યંત સંવેદનશીલ પ્રસંગે પણ પાણીના નિકાલની યોગ્ય વ્યવસ્થા ન હોવાથી સ્થાનિક રહીશોમાં સુરત મહાનગરપાલિકા (SMC) તંત્ર સામે ભારે વિરોધ અને આક્રોશ જોવા મળી રહ્યો છે.

કાયમી ઉકેલ લાવવા માગણી

સ્થાનિકોની માગ છે કે માત્ર કાગળ પર જ કામગીરી બતાવવાને બદલે પાલિકા તંત્ર દ્વારા ભાટેના વિસ્તારમાં પાણીના નિકાલ માટે કાયમી અને યોગ્ય આયોજન કરવામાં આવે. આવી કપરી પરિસ્થિતિમાં લોકોએ સુવિધાના અભાવે માનવતા અને સંવેદનાને નેવે મૂકીને અંતિમયાત્રા કાઢવી પડી, જે તંત્રની કામગીરી સામે મોટા સવાલો ઊભા કરે છે.