ઈસ્લામાબાદમાં અમેરિકા અને ઈરાન વચ્ચેની શાંતિ મંત્રણા નિષ્ફળ જતાં ફરી એકવાર મોટા યુદ્ધના ભણકારાં તથા વૈશ્વિક બજારની અસરને પગલે ભારતીય બજારમાં આજે સોના અને ચાંદીના ભાવમાં મોટો ઘટાડો જોવા મળ્યો છે. રોકાણકારો માટે આજે આંચકાજનક દિવસ રહ્યો છે, કારણ કે સોનામાં પ્રતિ 10 ગ્રામ રૂ. 1,195 અને ચાંદીમાં પ્રતિ કિલો રૂ. 6,084 નો કડાકો નોંધાયો હતો. સોનું રૂ. 1,195ના ઘટાડા સાથે રૂ. 1,51,547ના સ્તરે જયારે ચાંદી રૂ.6084ના ઘટાડા સાથે રૂ. 237190ના સ્તરે ટ્રેડ થઇ હતી.

રૂપિયો યુએસ ડોલર સામે 49 પૈસા ઘટીને 93.32 પર પહોંચી ગયો

આજે શરૂઆતના કારોબારમાં, ભારતીય રૂપિયો યુએસ ડોલર સામે 49 પૈસા ઘટીને 93.32 પર પહોંચી ગયો. ક્રૂડ ઓઇલના ભાવમાં વધારો અને યુએસ ચલણમાં મજબૂતાઈને કારણે રૂપિયા પર દબાણનો સામનો કરવો પડ્યો, જ્યારે વૈશ્વિક સ્તરે ચાલી રહેલી ભૂ-રાજકીય અનિશ્ચિતતાઓએ પરિસ્થિતિને વધુ વણસી. આંતરબેંક વિદેશી વિનિમય બજારમાં, રૂપિયો 93.30 પર ખુલ્યો અને ટૂંક સમયમાં વધુ ઘટીને 93.32 પર પહોંચી ગયો, જે તેના અગાઉના બંધ સ્તરથી 49 પૈસાનો ઘટાડો દર્શાવે છે. આ પહેલા, શુક્રવારે, રૂપિયો 32 પૈસાનો ઘટાડો દર્શાવતા 92.83 પર બંધ થયો હતો.

ક્રૂડ ઓઇલના ભાવ ફરીવાર 100 ડોલર પ્રતિ બેરલના સ્તરને પાર

ક્રૂડ ઓઇલના ભાવ ફરી એકવાર 100 ડોલર પ્રતિ બેરલના સ્તરને પાર કરી ગયા છે. આંતરરાષ્ટ્રીય બેન્ચમાર્ક, બ્રેન્ટ ક્રૂડ, લગભગ 8% વધીને લગભગ $102 પર પહોંચી ગયો, જ્યારે યુએસ ક્રૂડ તેલ પણ 8 ટકા વધીને 104 ડોલર પ્રતિ બેરલના સ્તરે ટ્રેડ થઈ રહ્યું છે. ડેટા પર નજર કરીએ તો, બ્રેન્ટ ક્રૂડની કિંમત 2026 ની શરૂઆતમાં 61 ડોલર પ્રતિ બેરલથી શરૂ થઈ હતી અને માર્ચના અંત સુધીમાં 118 ડોલર પ્રતિ બેરલ પર પહોંચી ગઈ હતી.