ગીર સોમનાથ જિલ્લાના કોડીનાર તાલુકાના આદપોકાર ગામે આજે કરૂણતાની પરાકાષ્ઠા સર્જાઈ છે. ગામના શિવ મંદિર નજીક આવેલા એક ઊંડા કુંડમાં ડૂબી જવાથી ૪૦ વર્ષીય માતા અને તેમની બે લાડકવાઈ દીકરીઓના કરૂણ મોત નીપજ્યા છે. આ સમાચાર વાયુવેગે પ્રસરતા આખું ગામ શોકમાં ડૂબી ગયું છે અને અનેક ઘરોમાં આજે ચૂલા પણ સળગ્યા નથી.

ભક્તિના માર્ગે મળ્યો કાળ
પ્રાપ્ત વિગતો અનુસાર ઇલાબેન વંશ પોતાની બે નાની દીકરીઓ રીતિકા અને એન્જલ સાથે શિવ મંદિરે દર્શન કરવા માટે ગયા હતા. મંદિર પાસે આવેલા જૂના અને ઊંડા કુંડ નજીકથી પસાર થતી વખતે અચાનક પગ લપસતા અથવા અન્ય કોઈ કારણોસર ત્રણેય કુંડના ઊંડા પાણીમાં ખાબક્યા હતા. કુંડની દીવાલો ઊંચી અને પાણી ઊંડું હોવાને કારણે તેઓ બહાર નીકળી શક્યા નહીં.

મૃતકોની વિગત
આ અકસ્માતમાં ભોગ બનેલા ત્રણેય મૃતકો એક જ પરિવારના છે:
માતા: ઇલાબેન રમેશભાઈ વંશ (ઉંમર ૪૦ વર્ષ)
દીકરી ૧: રિતિકા રમેશભાઈ વંશ (ઉંમર ૧૦ વર્ષ)
દીકરી ૨: એન્જલ રમેશભાઈ વંશ (ઉંમર ૭ વર્ષ)

મૃતક ઇલાબેનના પતિ રમેશભાઈ વંશ ગુજરાત એસટી (GSRTC) માં ઉના ડેપોમાં ડ્રાઇવર તરીકે ફરજ બજાવે છે. જ્યારે રમેશભાઈ માર્ગો પર મુસાફરોની સુરક્ષા સાથે નોકરી કરી રહ્યા હતા, ત્યારે કદાચ સપનેય નહીં વિચાર્યું હોય કે પાછળથી તેમનો આખો પરિવાર કાળના ખપ્પરમાં હોમાઈ જશે.

સ્થાનિકોની જહેમત છતાં વહાલસોઈ દીકરીઓ ન બચી
બનાવની જાણ થતા જ આસપાસના લોકો અને ગામના તરવૈયા યુવાનો તાત્કાલિક કુંડ પાસે દોડી આવ્યા હતા. ૧૦ વર્ષની રીતિકા અને ૭ વર્ષની એન્જલને જ્યારે બહાર કાઢવામાં આવી ત્યારે તેમના શ્વાસ થંભી ગયા હતા. બંને માસૂમ બાળકીઓએ ઘટનાસ્થળે જ દમ તોડી દીધો હતો.

માતાની અંતિમ લડત
સ્થાનિકોએ ઇલાબેનને જીવિત અવસ્થામાં બહાર કાઢી તાત્કાલિક હોસ્પિટલ પહોંચાડ્યા હતા. જોકે, નસીબને કંઈક બીજું જ મંજૂર હતું. સારવાર દરમિયાન હોસ્પિટલના બિછાને ઇલાબેને પણ અંતિમ શ્વાસ લીધા હતા.

ખુલ્લા કુંડ અને સુરક્ષા પર સવાલો
આદપોકાર ગામના લોકોમાં આ દુર્ઘટનાને પગલે ભારે આક્રોશ પણ જોવા મળી રહ્યો છે. વર્ષો જૂના અને ઊંડા કુંડ કે જેની આસપાસ સુરક્ષાની કોઈ મજબૂત વ્યવસ્થા ન હોવાને કારણે આજે બે માસૂમ ફૂલ જેવી દીકરીઓ અને એક માતાનો ભોગ લેવાયો છે.