આજે સવારે ૮ વાગ્યા સુધીના સરકારી આંકડા મુજબ દેવભૂમિ દ્વારકા જિલ્લામાં મોસમનો કુલ સરેરાશ વરસાદ ૩૯ ઈંચ (૯૭૧ મી.મી.) થવા પામ્યો છે. જેમાં સૌથી વધુ કલ્યાણપુર તાલુકામાં ૫૧ ઈંચ (૧૨૬૯ મી.મી.), દ્વારકા તાલુકામાં ૪૦ ઈંચ (૯૯૭ મી.મી.), ભાણવડ તાલુકામાં ૩૬ ઈંચ (૮૯૩ મી.મી.) અને ખંભાળિયા તાલુકામાં ૨૯ ઈંચ (૭૨૫ મી.મી.) થવા પામ્યો છે.


ઘી ડેમ ત્રીજી વખત ઓવરફ્લો !!

ખંભાળિયા તાલુકામાં અગાઉના વર્ષો કરતા સરેરાશ ઓછો થવા પામ્યો છે. આ વર્ષે ખંભાળિયા તાલુકાનો વરસાદ ૨૯ ઈંચ થયો છે. ત્યારે ખંભાળિયા શહેરને પીવાનું પાણી તથા આસપાસના વિસ્તારો માટે પણ સિંચાઈનું પાણી પૂરું પાડતો ઘી ડેમ પ્રારંભમાં ખાલી રહ્યો હોય, પરંતુ ઉપરવાસના વરસાદ તેમજ રેચ ફૂટવા અને તાજેતરના માવઠાના કારણે પ્રમાણમાં ઓછા વરસાદ છતાં પણ ત્રીજી વખત ઓવરફ્લો થતાં નગરજનોમાં આનંદની લાગણી પ્રસરી જવા પામી છે. ​​​​​​​


સિંહણ ડેમ પણ છલોછલ

ગત વર્ષોના પ્રમાણમાં ઓછા વરસાદ વચ્ચે ખંભાળિયા - જામનગર માર્ગ પર આવેલો આશરે ૨૨ ફૂટનો સિંહણ ડેમ ચોમાસાના અંત ભાગમાં આશરે ૧૮ ફૂટ જેટલો ભરાયો હતો. પરંતુ જમીનમાંથી રેચ ફૂટતા તેમજ અન્ય પરિબળોના લીધે હાલ સિંહણ ડેમ પણ ગમે તે સમયે ભરાઈ જાય તેવી શક્યતા છે. આ બાબતને પણ કુદરતની કૃપા માનવામાં આવે છે.