અંદામાનમાં આજ સવારથી નૈઋત્યનું ચોમાસુ સક્રિય બની ગયું છે. પ્રતિ કલાકના 40 થી 50 કિલોમીટરની ઝડપે પવન ફૂંકાય છે અને ધોધમાર વરસાદ શરૂ થયો છે. હવામાન ખાતાના જણાવ્યા મુજબ નિકોબાર અને બંગાળની ખાડીમાં નૈઋત્યનું ચોમાસુ આગળ વધવા માટે સાનુકૂળ સંજોગો છે અને 24 કલાકમાં જ આ પ્રક્રિયા પૂરી થાય તેવું લાગે છે.

હવામાન ખાતાના જણાવ્યા મુજબ આદામાનમાં નૈઋત્યના ચોમાસાએ એન્ટ્રી લીધા પછી આગામી ત્રણ થી ચાર દિવસમાં અરબી સમુદ્રના દક્ષિણ તરફના વિસ્તારમાં, માલદીવ અને બંગાળની ખાડીના બાકી રહેલા ભાગોમાં ચોમાસુ આગળ વધશે તેવું જણાઈ રહ્યું છે.

ગુજરાતમાં માવઠાના વરસાદનું જોર સાવ નહિવત 

બીજી બાજુ ગુજરાતમાં માવઠાના વરસાદનું જોર સાવ નહિવત થઈ ગયું છે. છેલ્લા 24 કલાક દરમિયાન સમગ્ર રાજ્યના માત્ર 19 તાલુકામાં સામાન્ય ઝાપટાથી પોણા બે ઇંચ જેટલો વરસાદ નોંધાયો છે. સૌથી વધુ વરસાદ તાપી જિલ્લાના કુકરમુંડામાં પોણા બે ઇંચ વરસાદ થયો છે. અમરેલી જિલ્લાના સાવરકુંડલામાં દોઢ અને મોરબી જિલ્લાના વાંકાનેરમાં એક ઇંચ વરસાદ થયો છે જામકંડોરણા જામજોધપુર મેંદરડા ધારી મુળી ચોટીલા લીંબડી લાલપુર તાલાલા પડધરી વઢવાણ અને લોધિકા તાલુકામાં સામાન્ય ઝાપટા પડ્યા છે. આજે સવારે છ થી આઠ વાગ્યાના પ્રથમ બે કલાકમાં રાજ્યના એક પણ તાલુકામાં વરસાદ નોંધાયો નથી.

હજુ આગામી દિવસોમાં ચારથી પાંચ ડિગ્રી જેટલું તાપમાન વધે તેવી શક્યતા

બીજી બાજુ ગરમીનું પ્રમાણ વધી ગયું છે અને હજુ આગામી દિવસોમાં ચારથી પાંચ ડિગ્રી જેટલું તાપમાન વધે તેવી શક્યતા છે. ગુજરાતની માફક નોર્થ વેસ્ટના અન્ય રાજ્યોમાં અને મધ્ય ભારતમાં ગરમી વધશે. પશ્ચિમ બંગાળ હિમાચલ પ્રદેશ ઝારખંડ રાજસ્થાન અને ઉત્તર પ્રદેશમાં હિટવેવ માટે એલર્ટ આપવામાં આવેલું છે.

આ રાજ્યોમાં વરસાદ માટેની આગાહી કરવામાં આવી

બીજી બાજુ પંજાબ હરિયાણા ચંડીગઢ દિલ્હી જમ્મુ કશ્મીર લદાખ કોકણ ગોવા મહારાષ્ટ્ર સિક્કિમ બિહાર ઓડિશા આંધ્ર પ્રદેશ કર્ણાટક તામિલનાડુ કેરલા આસામ મેઘાલય સહિતના રાજ્યોમાં વરસાદ માટેની આગાહી કરવામાં આવી છે.