સમગ્ર હિમાલયન રિજીયનને અને નોર્થ વેસ્ટ ઇન્ડિયાને પ્રભાવિત કરે તેવું એક વેસ્ટર્ન ડિસ્ટર્બન્સ આજે સર્જાયું છે અને આવું જ બીજું એક તાકાતવાળું વેસ્ટર્ન ડિસ્ટર્બન્સ આવતીકાલે મંગળવારે સર્જાશે. ઉપરા ઉપરી બબ્બે વેસ્ટર્ન ડિસ્ટર્બન્સના કારણે વાતાવરણમાં પણ અનેક ડિસ્ટર્બન્સ આવશે.

23મીએ સૌથી વધુ હિમવર્ષા થશે

હવામાન ખાતાના જણાવ્યા મુજબ આ સિસ્ટમની અસરના ભાગરૂપે જમ્મુ-કાશ્મીર, લદાખ, ઉત્તરાખંડ, હિમાચલ પ્રદેશમાં ભારેથી અતિ ભારે વરસાદ અને હિમવર્ષા માટેની ચેતવણી આપવામાં આવી છે. તારીખ 23ના હીમ વર્ષા અને વરસાદનુ સૌથી વધુ પ્રમાણ હશે.

આ રાજ્યોમાં ભારે વરસાદની આગાહી

જમ્મુ કશ્મીર અને હિમાચલ પ્રદેશ ઉપરાંત પંજાબ, હરિયાણા, ચંદીગઢ, ઉત્તર પ્રદેશ અને રાજસ્થાન, દિલ્હી સહિતના રાજ્યોમાં પણ ભારે વરસાદની ચેતવણી આપવામાં આવી છે. હવામાન ખાતાના જણાવ્યા મુજબ આજથી વાતાવરણમાં ફેરફારની અસર જોવા મળશે અને તા. 24 સુધી આ પ્રકારે વાતાવરણ રહેશે.

રાજસ્થાન અને હરિયાણામાં વરસાદની માત્રા વધુ રહેવાની શક્યતા

દક્ષિણના રાજ્યોમાં મોટાભાગના વિસ્તારોમાં નોર્થ ઈસ્ટ મોન્સૂન તેના અંતિમ તબક્કામાં પહોંચી ગયું છે. નિકોબાર ટાપુ જેવા વિસ્તારોમાં વરસાદ જોવા મળે છે. બાકી દક્ષિણના મોટાભાગના રાજ્યોમાં વરસાદની હાજરી દિન પ્રતિદિન ઘટી રહી છે. જ્યારે હવે જમ્મુ કશ્મીર સહિતના રાજ્યોમાં વરસાદ માટે આગાહી કરવામાં આવી છે. હવામાન ખાતાના જણાવ્યા મુજબ રાજસ્થાન અને હરિયાણા વચ્ચે સાયક્લોનીક સર્ક્યુલેશન જોવા મળે છે અને તે આસિસ્ટન્ટ સાથે ટચ થતું હોવાથી રાજસ્થાન અને હરિયાણામાં વરસાદની માત્રા વધુ રહેવાની શક્યતા છે.