આનો સીધો લાભ ગ્રામીણ મજૂરો, બેરોજગાર પરિવારો અને ગામડાઓમાં નાના માળખાકીય પ્રોજેક્ટ્સને થશે

૨૦૨૬ ના બજેટમાં, નાણામંત્રી નિર્મલા સીતારમણે ગરીબો, ખેડૂતો અને ગ્રામીણ ભારત પર ધ્યાન કેન્દ્રિત કરીને અનેક મુખ્ય સરકારી યોજનાઓ માટે નોંધપાત્ર ભંડોળ ફાળવ્યું છે. સૌથી મોટી ફાળવણી રોજગાર ગેરંટી યોજના (વીબી-જી રામ જી, જે અગાઉ મનરેગા હતું) માટે હતી. આ યોજના માટે રૂ. ૯૫,૬૯૨.૩૧ કરોડની જોગવાઈ કરવામાં આવી છે. ગયા વર્ષે, મૂળ બજેટ રૂ. ૮૬,૦૦૦ કરોડ હતું, જે સુધારેલા અંદાજમાં વધારીને રૂ. ૮૮,૦૦૦ કરોડ કરવામાં આવ્યું હતું. વધુમાં, આ વર્ષે મનરેગા કાર્યક્રમ ઘટક માટે રૂ. ૩૦,૦૦૦ કરોડ ફાળવવામાં આવ્યા છે. આનો સીધો લાભ ગ્રામીણ મજૂરો, બેરોજગાર પરિવારો અને ગામડાઓમાં નાના માળખાકીય પ્રોજેક્ટ્સને થશે.

ખાદ્ય સુરક્ષા માટ પ્રધાનમંત્રી ગરીબ કલ્યાણ અન્ન યોજના પર રૂ. 2,27,429 કરોડ ખર્ચવામાં આવશે. ગયા વર્ષનું બજેટ રૂ. 2,03,000 કરોડ હતું, જે સુધારેલા અંદાજમાં વધીને રૂ. 2,27,753.65 કરોડ થયું છે. આ યોજના લાખો ગરીબ પરિવારોને મફત અથવા સબસિડીવાળું રાશન પૂરું પાડે છે.

એકંદરે, બજેટ 2026નું ધ્યાન સ્પષ્ટ છે. ગામડાં, ખેડૂતો, ગરીબ દર્દીઓ અને રાશન-આધારિત પરિવારો આ વખતે ટોચની પ્રાથમિકતાઓ છે. ખેડૂતો માટે ચાલી રહેલી પ્રધાનમંત્રી કિસાન સન્માન નિધિ યોજના (પીએમ કિસાન યોજના) માટેનું બજેટ ગયા વર્ષની જેમ જ રૂ.63,500 કરોડ રાખવામાં આવ્યું છે. આ યોજના હેઠળ, નાના અને સીમાંત ખેડૂતોને સીધા તેમના ખાતામાં હપ્તા મળે છે, જે બીજ, ખાતર અને ખેતી ખર્ચમાં મદદ કરે છે

પીએમ-જય યોજના માટે રૂ.9,500 કરોડની ફાળવણી

આરોગ્ય ક્ષેત્રમાં, આયુષ્માન ભારત પ્રધાનમંત્રી જન આરોગ્ય યોજના (પીએમ-જય) માટે રૂ.9,500 કરોડ ફાળવવામાં આવ્યા છે. ગયા વર્ષે, ફાળવણી રૂ.9,401 કરોડ હતી, જે સુધારેલા અંદાજમાં ઘટાડીને રૂ.8,995 કરોડ કરવામાં આવી હતી. આ યોજના ગરીબ અને સંવેદનશીલ પરિવારોને મફત સારવાર પૂરી પાડે છે, ખાસ કરીને મોટી હોસ્પિટલોમાં મોંઘા ઉપચારના સમયમાં.