હોંગકોંગ પ્રશાસન દ્વારા ગત વર્ષે શહેરમાં લાગેલી અત્યાર સુધીની સૌથી ભયાનક અને દર્દનાક આગના મામલામાં બુધવારે એક મોટી કાનૂની કાર્યવાહી કરવામાં આવી છે. આ કેસમાં સાત વ્યક્તિઓ અને બે મોટી કંપનીઓ વિરુદ્ધ ગેરકાનૂની રીતે માનવવધ (હત્યા) અને છેતરપિંડીનું કાવતરું ઘડવા જેવા ગંભીર આરોપો હેઠળ ગુનો દાખલ કરવામાં આવ્યો છે.

૨૬ નવેમ્બર ૨૦૨૫ ના રોજ લાગેલી આ ભયાનક આગે જોતજોતામાં સાત બિલ્ડિંગોને પોતાની લપેટમાં લઈ લીધી હતી, જેમાં ૧૬૮ લોકો જીવતા ભુંજાયા હતા. હોંગકોંગ પોલીસ અને ભ્રષ્ટાચાર વિરોધી સંસ્થા દ્વારા સંયુક્ત રીતે હાથ ધરાયેલી આ કાર્યવાહીની સંપૂર્ણ વિગતવાર માહિતી નીચે મુજબ છે.

આ વિલાપજનક ઘટના હોંગકોંગના તાઈ પો (Tai Po) નામના ઉપનગરીય વિસ્તારમાં આવેલા વાંગ ફુક કોર્ટ (Wang Fuk Court) રેસિડેન્શિયલ કોમ્પ્લેક્સમાં બની હતી, જ્યાં હજારો લોકો વસવાટ કરતા હતા. આ અકસ્માત પાછળ બિલ્ડિંગના રિનોવેશનમાં થયેલો મોટો ભ્રષ્ટાચાર અને સુરક્ષાના નિયમોની ઘોર ઉપેક્ષા જવાબદાર હોવાનું સામે આવ્યું છે.

મની લોન્ડરિંગ અને ટેક્સ ચોરી સહિત 25 ગંભીર આરોપો
હોંગકોંગ પોલીસ અને ઇન્ડિપેન્ડન્ટ કમિશન અગેન્સ્ટ કરપ્શન (ICAC) ની સંયુક્ત તપાસ બાદ આરોપીઓ પર સકંજો કસવામાં આવ્યો છે. તપાસ એજન્સીઓએ શંકાસ્પદો વિરુદ્ધ કોર્ટમાં કુલ 25 આરોપો દાખલ કર્યા છે. આ આરોપોમાં માત્ર ગુનાહિત બેદરકારી જ નહીં, પરંતુ:

ગેર-ઇરાદતન હત્યા (Manslaughter)
સરકારી ન્યાય પ્રક્રિયામાં અવરોધ ઊભો કરવાનો પ્રયાસ
મની લોન્ડરિંગ (નાણાકીય હેરાફેરી)
મોટા પાયે ટેક્સ ચોરી (કરચોરી) જેવા ગંભીર ગુનાઓ સામેલ છે.

ભ્રષ્ટાચારની ગંધ
વાંગ ફુક કોર્ટના મોટા રિનોવેશન પ્રોજેક્ટમાં આ સાતેય આરોપીઓએ અલગ-અલગ સ્તરે ભ્રષ્ટાચાર આચર્યો હોવાના પુરાવા મળ્યા છે. જે બે અગ્રણી કંપનીઓ પર આ અગ્નિકાંડનો દોષ મઢવામાં આવ્યો છે.

બે મોટી કંપનીઓ પણ સકંજામાં
01. પ્રોજેક્ટ કન્સલ્ટન્સી ફર્મ ‘વિલ પાવર આર્કિટેક્ટ્સ કંપની’
02. પ્રોજેક્ટની મુખ્ય કોન્ટ્રાક્ટર ફર્મ ‘પ્રેસ્ટિજ કન્સ્ટ્રક્શન એન્ડ એન્જિનિયરિંગ કંપની’ 
આ કંપનીઓએ નબળા બાંધકામ અને સુરક્ષા સિસ્ટમ સાથે છેડછાડ કરીને નિર્દોષ લોકોના જીવ જોખમમાં મૂક્યા હતા.

આરોપીઓ કોર્ટમાં રજૂ
આ કેસના મુખ્ય સાત આરોપીઓ જેમાં કંપનીઓના ડાયરેક્ટર્સ પણ સામેલ છે - વોંગ હેપ-યિન, હાઉ વા-કિન, હો કિન-યિપ, એનજી યેઉક, હંગ ક્વોક-વાઈ, ચુંગ સો-ફેન અને લિન મીનને બુધવારે બપોરે હોંગકોંગની કોર્ટમાં રજૂ કરવામાં આવ્યા હતા. સુનાવણી દરમિયાન આરોપીઓએ કોર્ટને જણાવ્યું હતું કે તેઓ પોતાના પર લાગેલા આરોપોને સમજી ગયા છે. કોર્ટ રૂમમાં મોટાભાગના આરોપીઓ બિલકુલ શાંત અને ગંભીર દેખાતા હતા. ૧૬૮ લોકોના પરિવારોને ન્યાય અપાવવા માટે આ કેસની સુનાવણી ફાસ્ટ ટ્રેક પર ચલાવવાની માગ ઉઠી છે.