ગુજરાતમાં ખેતરોમાંથી પસાર થતી ખાનગી કંપનીઓની વીજલાઈન અને વીજપોલ (વીજળીના થાંભલા)ના યોગ્ય વળતરની માંગ સાથે ખેડૂતો ફરી એકવાર આરપારના મૂડમાં જોવા મળી રહ્યા છે. મોરબી જિલ્લાના જેતપર ગામેથી વીજપોલના પૂરતા વળતર મામલે હવે 'આંદોલન પાર્ટ-૩' ના સત્તાવાર મંડાણ કરી દેવામાં આવ્યા છે. જેના ભાગરૂપે જેતપર ગામની રામવાડી ખાતે મોરબી સહિત સૌરાષ્ટ્રના ૧૨ જિલ્લાના ખેડૂત આગેવાનોની એક ખૂબ જ મહત્વની બેઠક યોજાઈ છે. આ બેઠકમાં સરકાર દ્વારા વીજપોલના વળતર સંદર્ભે બહાર પાડવામાં આવેલા નવા પરિપત્ર અંગે વિસ્તૃત ચર્ચા-વિચારણા કરવામાં આવી રહી છે, અને આ આંદોલનને સમગ્ર ગુજરાતમાં વ્યાપી બનાવવા માટે એક નવી નીતિ ઘડવામાં આવી રહી છે.

ખાનગી કંપનીઓ સામે ખેડૂતોમાં વ્યાપક નારાજગી

હાલ મોરબી જિલ્લા સહિત સમગ્ર ગુજરાત રાજ્યમાં જુદી-જુદી ખાનગી કંપનીઓ દ્વારા ખેતરોમાં વીજપોલ ઊભા કરવા અને હાઈટેન્શન વીજ વાયર પાથરવાની કામગીરી મોટા પાયે ચાલી રહી છે. જોકે, ખેડૂતોના મૂલ્યવાન ખેતરોમાં ઊભા કરાતા આ વીજપોલ અને માથા પરથી પસાર થતી લાઈનના બદલામાં કંપનીઓ દ્વારા ખૂબ જ ઓછું આર્થિક વળતર અપાતું હોવાથી ખેડૂત આલમમાં વ્યાપક નારાજગી અને આક્રોશ જોવા મળી રહ્યો છે. આ અગાઉ પણ યોગ્ય અને ન્યાયિક વળતરની માંગ સાથે જેતપર ગામે ખેડૂતોએ સતત ૧૯ દિવસ સુધી આમરણાંત ઉપવાસ આંદોલન કરીને સરકાર સામે બાયો ચડાવી હતી. તે સમયે ૧૯મા દિવસે આંદોલનકારી ખેડૂતોની તબિયત લથડતાં, તેમના સ્વાસ્થ્યને અગ્રતા આપીને વડીલો અને આગેવાનો દ્વારા પારણા કરાવાયા હતા, પરંતુ ખેડૂતોની લડત અટકી ન હતી.

સરકારના નવા પરિપત્ર સામે અસંતોષ

ખેડૂતોના ભારે વિરોધને પગલે સરકારે તાજેતરમાં ખાનગી વીજ કંપનીના વીજપોલ અને વાયરના વળતર અંગે એક નવી નીતિ જાહેર કરી નવો પરિપત્ર પ્રસિદ્ધ કર્યો છે. જોકે, જેતપર અને સૌરાષ્ટ્રના ખેડૂતોએ સરકારના આ નવા પરિપત્ર સામે પણ ભારે અસંતોષ વ્યક્ત કર્યો છે. ખેડૂતોનું માનવું છે કે સરકારના આ નવા નિર્ણય અને નીતિથી પણ જમીન માલિકોને મોટું આર્થિક નુકસાન વેઠવાનો વારો આવશે. આ પરિપત્રની વિસંગતતાઓ અને તેનાથી થનારા નુકસાન અંગે ઊંડાણપૂર્વક ચર્ચા કરવા માટે રાત્રે ૯:૦૦ વાગ્યે ૧૨ જિલ્લાના ખેડૂત પ્રતિનિધિઓની બેઠક બોલાવાઈ છે. આ મંથનમાં મોરબી, રાજકોટ, જામનગર, દેવભૂમિ દ્વારકા, ગીર સોમનાથ, જૂનાગઢ, પોરબંદર, અમરેલી, ભાવનગર, બોટાદ, કચ્છ અને બનાસકાંઠા જિલ્લાના ખેડૂત આગેવાનો એકમંચ પર આવીને રણનીતિ નક્કી કરશે.

ગુજરાત સ્તરે રચાશે નવી 'આંદોલન કમિટી'

વીજપોલ વળતરની આ લડતને વધુ સંગઠિત અને મજબૂત બનાવવા માટે આગામી વ્યૂહરચનાના ભાગરૂપે બીજી એક મોટી બેઠકનું આયોજન પણ કરી દેવાયું છે. આગામી ૯ તારીખે રાત્રે ૯:૦૦ વાગ્યે ગુજરાતના અન્ય વધુ ૧૨ જિલ્લાના ખેડૂત અગ્રણીઓની બેઠક મળશે. આ દ્વિતીય તબક્કાની બેઠકમાં સાબરકાંઠા, પાટણ, સુરેન્દ્રનગર, અમદાવાદ, આણંદ, વડોદરા, ભરૂચ, સુરત, વાવ-થરાદ, મહેસાણા, ગાંધીનગર અને નર્મદા જિલ્લાના ખેડૂત પ્રતિનિધિઓ ખાસ ઉપસ્થિત રહીને પોતાનો પક્ષ મૂકશે. આમ, રાજ્યના તમામ જિલ્લાના ખેડૂતો સાથે વિસ્તૃત સંવાદ સાધીને સર્વસંમતિ સાધવામાં આવશે. ત્યારબાદ તમામ ક્ષેત્રોનું પ્રતિનિધિત્વ કરતી એક મજબૂત 'ગુજરાત રાજ્ય સ્તરીય નવી આંદોલન કમિટી'ની સત્તાવાર જાહેરાત કરાશે. આ નવરચિત કમિટીના નેતૃત્વ હેઠળ ખાનગી વીજ કંપનીઓ પાસેથી જમીનનું પૂરતું વળતર વસૂલવા માટે 'આંદોલન પાર્ટ-૩' અંતર્ગત રાજ્યવ્યાપી ઉગ્ર પ્રદર્શનો શરૂ કરવામાં આવશે.