રાજ્યપાલ આચાર્ય દેવવ્રત અને મુખ્યમંત્રી ભૂપેન્દ્રભાઈ પટેલ દ્વારા ગાંધીનગરથી થયેલા રાજ્યવ્યાપી ઇ-લોકાર્પણ અંતર્ગત રાજકોટ સબ માર્કેટ યાર્ડ ખાતે પ્રાકૃતિક કૃષિ ખેત પેદાશ વેચાણ કેન્દ્રનો શુભારંભ કરાયો હતો.

નાયબ મુખ્ય દંડક જગદીશભાઈ મકવાણા, ધારાસભ્ય ડો.દર્શિતાબેન શાહ અને કલેક્ટર ડો. ઓમ પ્રકાશના હસ્તે પ્લેટફોર્મ નં.૮ ઉપર કેન્દ્ર ખુલ્લું મુકાયું હતું. મહાનુભાવોએ ખેડૂતોના સ્ટોલની મુલાકાત લઈ ઉત્પાદનોનું નિરીક્ષણ કર્યું હતું.

આ પ્રસંગે નાયબ મુખ્ય દંડક જગદીશભાઇ મકવાણાએ જણાવ્યું કે, પ્રાકૃતિક ખેતીને પ્રોત્સાહન અને ખેડૂતોને પોષણક્ષમ ભાવ મળે તે માટે રાજ્યમાં મહાપાલિકા, નગરપાલિકા, જિલ્લા અને તાલુકા કક્ષાએ ૧૦૦ કેન્દ્રો શરૂ કરાયા છે.

ધારાસભ્ય ડો. દર્શિતાબેને રાસાયણિક ખાતરથી કેન્સર જેવા રોગો વધતા હોવાનું જણાવી પ્રાકૃતિક ઉત્પાદનો અપનાવવા અપીલ કરી હતી.

રાજકોટ જિલ્લામાં ૨૦,૫૦૦ ખેડૂતો ૨૮,૦૦૦ એકરમાં પ્રાકૃતિક ખેતી કરે છે. આ પ્રસંગે એપીએમસી ચેરમેન જયેશભાઇ બોઘરા સહિતના ઉપસ્થિત રહ્યા હતા.