૨૦૨૫-૨૬ માં રાજ્યોના નાણાકીય સુધારાનું ચિત્ર ધીમે ધીમે સ્પષ્ટ થઈ રહ્યું છે. તાજેતરના સરકારી આંકડા દર્શાવે છે કે દેશના મુખ્ય રાજ્યોમાં કર વસૂલાત અને મૂડી ખર્ચમાં કોઈ સમાન વલણ નથી. કેટલાક રાજ્યોમાં કર વસૂલાતમાં ગતિ આવી છે, જ્યારે અમુક વિકાસ પર ખર્ચ કરવામાં અન્ય રાજ્યો કરતા આગળ નીકળી ગયા છે. એપ્રિલ-નવેમ્બર સમયગાળા માટે કેગના ડેટા અનુસાર, કર્ણાટકમાં દેશભરમાં કર આવક વૃદ્ધિમાં સૌથી ઝડપી ઉછાળો જોવા મળ્યો છે, જ્યારે ગુજરાત ખર્ચમાં વધારો કરવામાં આગળ છે. કેન્દ્રીય કરના હિસ્સાને બાદ કરતાં, કર્ણાટક રાજ્યના પોતાના કર આવકના સંદર્ભમાં તમામ મુખ્ય રાજ્યો કરતાં આગળ નીકળી ગયું છે. તેનું કર વસૂલાત ૨૧ ટકા વધીને રૂ.૧,૩૪,૧૦૯ કરોડ થઈ ગયું છે, જે ૧૫.૪૬ ટકાની વૃદ્ધિ દર્શાવે છે.

ટેક્સ રેવન્યૂ ગ્રોથમાં ટોપ પાંચ રાજ્યોની વાત કરીએ તો પ્રથમ ક્રમે કર્ણાટક, બીજા ક્રમે રાજસ્થાન, ત્રીજા ક્રમે મહારાષ્ટ્ર, ચોથા ક્રમે ઉત્તર પ્રેશ અને પાંચમા ક્રમે ગુજરાત આવે છે. મહારાષ્ટ્ર હજુ પણ આગળ છે. જોકે, કુલ કર વસૂલાતની દ્રષ્ટિએ કર્ણાટક હજુ પણ મહારાષ્ટ્ર અને ઉત્તર પ્રદેશથી પાછળ છે. આનું એક મુખ્ય કારણ એસજીએસટી વસૂલાત પર અસર હોવાનું કહેવાય છે. 22 સપ્ટેમ્બર, 2025થી અમલમાં આવેલા જીએસટી દરના તર્કસંગતકરણથી એસજીએસટી વૃદ્ધિ પર અસર પડી, જે ફક્ત કર્ણાટક સુધી મર્યાદિત ન હતી પરંતુ લગભગ તમામ મુખ્ય રાજ્યોમાં પણ જોવા મળી હતી.

મૂડી ખર્ચમાં ગુજરાત સૌથી વધુ વૃદ્ધિ પામ્યું, જેમાં 48.18 ટકાનો વધારો થયો છે. ત્યારબાદ મહારાષ્ટ્ર (19.03 ટકા) અને કર્ણાટક (16.57 ટકા)નો ક્રમ આવે છે. જોકે, કુલ રકમની દ્રષ્ટિએ ઉત્તર પ્રદેશમાં સૌથી વધુ મૂડી ખર્ચ હતો, પરંતુ ગયા નાણાકીય વર્ષના સમાન સમયગાળાની તુલનામાં તેમાં ઘટાડો જોવા મળ્યો. રિપોર્ટ અનુસાર, સિક્કિમ અને મધ્યપ્રદેશ ઉચ્ચ રાજકોષીય ખાધ ધરાવતા રાજ્યોની યાદીમાં ટોચ પર છે, દરેક લગભગ ચાર ટકા સાથે. પંજાબ અને આંધ્રપ્રદેશમાં પણ સૌથી વધુ રાજકોષીય ખાધ છે, લગભગ 3.8 ટકા સાથે.